Nizamiqızı Gülər

 

“Özümüzünkülər özümüzə ləkə yaxmağa çalışırlar”.

Əbülfəs Qarayev: "Üzeyir Hacıbəyovun heykəli nə mənim, nə də hansısa partiya

                        rəhbərinin deyil ki, kimsə qərəzli mövqeyini bildirsin"

 

Dünən mədəniyyət və turizm naziri Əbülfəs Qarayev növbəti dəfə jurnalistlərlə görüşdü. Muzey Mərkəzində baş tutan tədbirdə nazir üç əsas məsələyə toxundu. Öncə bir neçə ayda görülən işləri açıqladı. Bildirdi ki, yeni yaradılmış nazirlik mədəni irsin gücləndirilməsi, mədəni əlaqələrin yaradılması, nəşriyyat işinin tənzimlənməsi üçün bir sıra işlər görüb.

Kadrların işlə təmin olunmasına gəlincə, nazir əvvəllər Mədəniyyət Turizm Nazirliyində çalışanların 80 faizinə həvalə olunduğunu bildirdi. Qalan 20 faiz işçinin isə məsuliyyətsizliyinə görə vəzifədən uzaqlaşdırıldığını vurğuladı. Nazir daha sonra Avstriya səfərinin həm miisbət, həm mənfi nəticələrindən söz açdı: "Avstriyada Azərbaycanın dahi bəstəkarı Üzeyir Hacıbəyovun heykəlinin qoyulması böyük tarixi hadisədir. Çünki belə hal ilk dəfədir, baş verir. Ən azı ona görə ki, heykəlin üstündə sənətkarın anadan olduğu yer Şuşa göstərilib". Ə.Qarayevi səfərlə bağlı bədbinləşdirən məqam www.mediaform saytında yayılan xəbərlər olub: "Mədəniyyətimizi dünyada təbliğ etmək üçün şərait yaradıldığı bir vaxtda özümüziinkülər özümüzə ləkə yaxmağa çalışırlar. Bir çox KİV-lər həmin tədbirdə iştirak edərək, canlı şahidi olaraq işıqlandırıb. Amma mediaform saytı tədbirin baş tutmadığını və heykəlin mürəkkəblə ləkələndiyi xəbərini yaydı. Həmin heykəl nə mənim, nə də hansısa partiya rəhbərinin deyil ki, kimsə qərəzli mövqeyini bildirsin". Nazirin iradı daha sonra mətbuata tuşlandı. Üzünü qəzet' işçilərinə tutub, onları qalmaqal yaratmaqda günahlandırdı. Bildirdi ki, son zamanlar qəzet işçiləri mədəniyyət xadimləri haqqında alçaldıcı məqalələr yazırlar: "Şou aləmiylə mədəniyyəti qarışdırmaq olmaz. Mənim üçün bütün mədəniyyət xadimləri eynidir. Onları alçaltmaq dedi-qodu yaymaqla məşğul olmaq jurnalistin işi deyil".

 

Olaylar.- 2006. 9 iyun. S. 8.