Mədəniyyət işçilərinin əmək haqları artırılacaq

Pekin olimpiya oyunlarına hazırlıq işlərinə İS9 5,7 mln. AZN ayrılması nəzərdə tutulur

Dünən Milli Məclisin Mədəniyyət məsələləri komissiyasında "2007-ci ilin dövlət büdcəsi haqqında" qanun layihəsində mədəniyyət sektoru üçün nəzərdə tutulan vəsaitlərlə bağlı müzakirələr aparılıb. Müzakirələrdə Mədəniyyət və Turizm Nazirliyinin və digər aidiyyəti qurumların nümayəndələri iştirak ediblər. Mədəniyyət işçilərinin əməkhaqlarının aşağı olduğunu deyən komissiyanın sədri Nizami Cəfərov bildirib ki, kitabxanalara yeni nəşrlərin alınması üçün də az vəsait ayrılır. Bu özünü digər sahələrdə də göstərir. Maliyyə Nazirliyinin idarə rəisi Xaqani Rzayev isə bildirib ki, gələn il büdcədən maliyyələşən təşkilatlarda çalışanların əməkhaqlarının ödənməsi üçün 271 mln. AZN vəsait nəzərdə tutulub, bu da təqribən 630 min nəfərə şamil ediləcək. Digər sahələrdə çalışanlarla yanaşı, mədəniyyət işçilərinin də əmək haqları artırılacaq: "Gələn il üçün mədəniyyət, incəsənət, informasiya, bədən tərbiyəsi və digər kateqoriyalara aid edilməyən sahədə fəaliyyətlərə büdcədən 90 milyon AZN vəsait ayrılması nəzərdə tutulur. Bu vəsaitin 46 AZN-i mədəniyyət və incəsənət sahəsinə, 30 milyon AZN-i radio, televiziya və nəşriyyat işlərinə, 13,3 milyon AZN-i isə bədən tərbiyəsi, gənclər siyasəti və turizm sahələrinə yönəldiləcək. Gələn il "Azərbaycan gəncliyi" Dövlət Proqramına isə 1,7 mln. AZN vəsait ayrılacaq ki, bu proqram çərçivəsində gənclərin məşğulluğu, narkotiklə mübarizə tədbirləri və s həyata keçirilməsi nəzərdə tutulur. Pekində keçiriləcək yay olimpiya oyunlarına hazırlıq işlərinə isa büdcədən 5,7 mln. AZN vəsaitin ayrılması nəzərdə tutulur".

Gələn ilin büdcəsində pozitiv dəyişikliklərin olduğunu deyən Mədəniyyət və Turizm nazirinin müavini Ədalət Vəliyev isə bildirib ki, bununla belə, teatrların fəaliyyətinə ayrılan vəsait digər sahələrlə müqayisədə azdır. Kitabxana fondunun zənginləşdirilməsinə isə cəmi 460 min AZN vəsait ayrılması nəzərdə tutulur.

Millət vəkili Rafael Hüseynov isə deyib ki, kino sahəsinə ayrılan vəsaitlə dünyaya təqdim edilə bilən kino çəkmək mümkün deyil. Millət vəkili kitabxanaların vəziyyətindən, onlara az vəsait ayrılmasından narazılıq edib. R. Hüseynov cizgi filmləri sahəsində problemin olduğunu da qeyd edib və bu sahənin inkişafı üçün büdcədən vəsait ayrılmasını istəyib.

Səs.-2006.- 2 noyabr.- S. 5.