Kəngərli Q.

Almatıda keçirilmiş Beynəlxalq moda həftəsində Fəxriyyə Xələfova diploma layiq görülmüşdür

“Pro Mode” Beynəlxalq Agentliyi, Qazaxıstanın Moda Palatası və Almatı Şəhər Hakimiyyətinin birgə təşkilatçılığı ilə noyabrın 22-dən 25-dək Almatıda Beynəlxalq moda həftəsi keçirilmişdir.
Dünyanın 10 ölkəsindən gəlmiş 30-dan artıq moda ulduzu arasında Azərbaycanı, müxtəlif beynəlxalq sərgilərdə uğur qazanmış tanınmış modelyer Fəxriyyə Xələfova təmsil etmişdir. Moda bayramında onun yaz-yay mövsümünə aid "Azərbaycan milli geyimləri" orijinal kolleksiyası nümayiş etdirilmiş və diploma layiq görülmüşdür. Fəxriyyə Xələfovanın kolleksiyası münsiflər heyətinin və tamaşaçıların böyük rəğbətini qazanmış və o, gələn il Astanada keçiriləcək nüfuzlu moda festivalına dəvət almışdır.
Xatırladaq ki, Fəxriyyə Xələfova Almatıda 2000-ci ildə keçirilmiş beynəlxalq moda müsabiqəsində də iştirak etmişdi və o zaman da onun kolleksiyası diploma layiq görülmüşdür.

Azərbaycan.-2006.-28 noyabr.-S.6.