Azərbaycan musiqisi Yaponiyada

Noyabrın 25-də AYDC "Qafqaz-Xəzər Salonu" proqramı növbəti tədbirini "Azərbaycan milli musiqisi və rəqsi" başlığı altında Yaponiyada keçirib. Təşkilatdan verilən məlumata görə, milli rəqsimizi əks etdirən foto-şəkillərlə dizayn edilmiş plakatlar və broşürlər Osaka əyalətinin elan guşələrinə və eləcə də Yaponiyada fəaliyyət göstərən xeyli sayda beynəlxalq mərkəzlərdə asılıb. Tədbir barəsində yapon qəzetlərində və AYDC-nin veb saytında yapon və ingilis dillərində elanlar dərc olunub. Tədbir bütün Yaponiya ictimaiyyətinə açıq elan olunmuşdu. Qeyd edək ki, tədbirin təşkilatçısı AYDC sədri, Osaka Universitetinin tədqiqatçı alimi və "Qafqaz-Xəzər Salonu" layihəsinin müəllifi Rəhman Şahhüseynlidir. Layihə bu ilin aprel ayında Yaponiyada 30-a yaxın QHTnin iştirak etdiyi qrant müsabiqəsinin qalibi olub. Hazırda alınan qrant vəsaiti ilə və eləcə də AYDC sədrinin şəxsi imkanları hesabına Azərbaycan Yaponiyada geniş şəkildə təbliğ edən seminarlar və konfranslar təşkil olunur. Tədbirdə peşəkar rəqqas Ramil Cəfərov iştirak edib, həmçinin klassik Azərbaycan musiqiləri və muğam səsləndirilib.

Qeyd edək ki, Dünya Azərbaycanlarının Həmrəyliyi Günü münasibətiylə dekabrın 28-də AYDC "Qafqaz-Xəzər Salonu"nun təşkilatçılığı ilə Osaka şəhərində bayram ziyafəti təşkil ediləcək.

Xalq cəbhəsi.- 2006. 29 noyabr.- S. 11.