Əsədov B.

Sankt-Peterburqda Azərbaycan tarı nümayiş etdirilib

Ölkəmizin Rusiyanın Sankt-Peterburq şəhərindəki Baş konsulluğunun təşəbbüsü ilə Şeremetyev sarayının Musiqi Muzeyində Azərbaycan tarına həsr olunmuş tədbir keçirilib.
Tədbirdə Peterburq Konservatoriyasının professorları V.Qureviç, M.Lobanov, İ.Alaşevski, Azərbaycan diasporunun nümayəndələri iştirak ediblər. Tamaşaçılara Azərbaycan tarının meydana gəlməsi tarixi haqqında geniş məlumat verilib, dünya mədəniyyətinin zənginləşməsində tarın rolundan danışılıb. Onlar Azərbaycanın baş konsulu Qüdsi Osmanovun məşhur tarzənlərimiz Mirzə Sadıqın və Mirzə Fərəc Rzanın tarın təkmilləşdirilməsi sahəsində işlərinə dair söhbətini maraqla dinləyiblər. Heydər Əliyev Fondunun muğamın mühafizəsinə və inkişafına böyük qayğı göstərdiyi xüsusi qeyd olunub. Muzeyin musiqi alətləri şöbəsinin müdiri V.Koşelyov tədbirə qatılanlara tarın 31 nümunəsini nümayiş etdirib və şərh verib. Sonra tarzən Çələbi, skripka ustası V.Şulyakovski, violonçeldə çalan V.Sobolenko və digər ifaçılar Azərbaycan və Avropa klassiklərinin əsərlərini, habelə milli musiqimizlə Avropa musiqisinin sintezini səsləndiriblər.

Azərbaycan.- 2006.- 23 noyabr.- S. 7.