Xalqa bağlı sənətkar

Ürəyinin, qəlbinin odunu sənətə verən insanların əməyini xalq heç vaxt unutmur, həmişə yüksək qiymətləndirir. Belə sənətkarlardan biri də qarmonçalan Aslan İlyasovdur. O, həyatı dərk etdiyi gündən milli musiqimizin qorunub saxlanmasına, inkişaf etməsinə çalışır. Xalqımızın nadir incilərini təbliğ edib dünyaya çatdırır. Ona görə də musiqi sənətində öz layiqli yerini tutub. Qarmonda səsləndirdiyi milli rəqslər, yanıqlı havalar adamın ruhunu oxşayır. Aslan İlyasovla söhbətlərin birində dedi:
- 1993-cü ildə ümummilli liderimiz Heydər Əliyev televiziya çıxışlarında bildirdi ki, hər bir kəs iki ağac əkib öz övladı kimi böyütsə, boş qalan sahələrimiz tamamilə yaşıllaşar. Öz-özümə dedim ki, çox yaxşı məsləhətdir. Ona görə Bakı-Salyan yolunun 116-cı kilometrliyində Qızılçıraq adlanan 5 hektar ərazidə park saldım, Bağa Heydər Əliyevin adını verdim. Orada kimsəsizlər evi tikdirdim. İndi orada namaz qılırlar, onlara pulsuz çay verilir. Ərazidə vaxtilə ticarət obyekti də var idi. Həmin yerdə "Heydər Əliyevin sənət dünyası" muzeyini yaratdım və büstünü qoydurdum.
A.İlyasov keçdiyi sənət yolundan söz açaraq dedi: "Təxminən 9-10 yaşlarında olardım. Qonşuluqda Əvəzağanın mandalinası var idi. Özü çalardı. Alıb çalmaq istəyəndə vermirdi, "simlərini sındırarsan" deyirdi. Bir gün taxta parçasını götürüb ona mıx vurdum və sim bağlayıb dınqıldatmağa başladım. Musiqiyə böyük həvəsim oldluğunu görən atam mənə mandalina aldı. Sonra rayonun Pioner evinə gedib tar şöbəsində musiqi təhsili aldım. Burada tarın sirlərini öyrəndim. Bir gün atam məni yanına çağırıb dedi ki, kirvəmiz bizi qonaq çağırıb. Tarı da götür, gedək onlara. Orada mənə dedilər ki, tarda bir "Zabul" çal. Həvəslə çalmaq istəyirdim, amma tar tez-tez kökdən düşürdü. Bu da mənə pis təsir bağışlayırdı. Evə gələndə qarmon çalacağımı bildirdim. Atam narazı qaldı, amma məni inadımdan döndərə bilmədiyindən gedib qarmon aldı. On bir yaşımdan qarmon çalıram. Sonradan rayonun bir sıra tədbirlərində iştirak etdim. Qonşu rayonlara da konsert verməyə gedərdik. Bir dəfə Salyan mədəniyyət evində gənc musiqiçilərin sənətinə baxış keçirilirdi. Məni də dəvət etmişdilər. Həmin müsabiqəyə gəldim. Təəssüflər olsun ki, konsertin başlanmasına bir saat qalmış dedilər ki, sən çalmayacaqsan, çünki rayon partiya komitəsindən belə göstəriş veriblər. Müraciət etdikdə sözləri bu oldu ki, gələn dəfə çalarsan. Bu məni geri salırdı. Çünki bir də belə tədbir 5-6 ildən sonra olacaqdı. Evə qayıdıb valideynlərimə Bakıya gedəcəyimi bildirdim. Bu hadisədən sonra Azərbaycan Dövlət Televiziya və Radio Şirkətinə gəlib qarmonda ifa etdiyim rəqsləri lentə yazdırmaq istədiyimi bildirdim. Salyandan gəldiyimi dedim. 25 nəfərdən ibarət komissiya üzvü qarşısında əvvəlcə "Tərəkəmə", sonra "Aslanı" rəqsini çaldım, xoşlarına gəldi. Komissiya üzvləri rəqsləri lentə yazdırmağımı qərara aldılar. Köçürülmüş lent yazısı radio komitəsinə verildi. "Aslanı" rəqsinin adını dəyişib "Yeni rəqs" qoymaq istədilər. Razılaşdım. 5-6 il bu rəqs "Yeni rəqs" adı altında səsləndirildi. Sonradan "Aslanı" rəqsi kimi çalındı.
Çox rəqslər yazmışam. Bir dəfə məhsul bayramı ilə əlaqədar Cəlilabada getmişdik. Orada üzümçülərə də rəqs həsr etməyimi xahiş etdilər. Bir həftə ərzində "Üzümçülər " rəqsini yazdım. Bir sıra rəqslərim, o cümlədən "Ülviyyə", "Zəminə" və "Nazənin" kimi rəqslərim də radionun qızıl fondunda saxlanılır.
Respublikamızın bütün rayonlarında olmuşam və kənd zəhmətkeşləri qarşısında çıxışlar etmişəm. "Azkonsert" Birliyinin solisti kimi filarmoniyada konsertlərim olub. Xan əmi, Rübabə Muradova, Yaqub Məmmədov, Arif Babayev, Hacıbaba Hüseynov, İslam Rzayev və Bəhram Mansurov kimi böyük sənətkarlarla birlikdə el şənliklərində iştirak etmişəm. Dəfələrlə xeyriyyə marafonu keçirmişik. İmkansızlara, kimsəsizlərə və qocalara əl tutmuşuq. Musiqimizdə böyük irəliləyiş var, onun sabahından rahatam. Çünki dövlətimiz bu sahəyə qayğı ilə yanaşır. YUNESKO-nun xoşməramlı səfiri, Heydər Əliyev Fondunun prezidenti, Milli Məclisin deputatı Mehriban xanım Əliyevanın milli musiqimizə yüksək səviyyədə qayğı göstərməsi də bunu bir daha təsdiq edir.
A.İlyasov onu da bildirdi ki, Prezident İlham Əliyevin respublikanın bölgələrinə, o cümlədən Salyana gəlişindən sonra digər sahələrdə olduğu kimi, rayonların mədəni həyatında da dönüş yaranıb.

Azərbaycan.-2006.-16 noyabr.-S.8.