Bülbüloğlu Polad: İnformasiya sahəsində əməkdaşlıq ikitərəfli münasibətlərin xaraktrindən irəli gəlir

Əziz oxucular! "Azərbaycan" qəzetinə əlavə olan "Rusiyadan xəbərlər" buraxılışın;n ilk nömrəsi qarşınızdadır. Bu nəşr Azərbaycan oxucusunu Rusiya cəmiyyətinin siyasi, iqtisadi və mədəni həyatında baş verən ən maraqlı hadisələrlə, habelə ikitərəfli münasibətlər sahəsində xəbərlərlə müntəzəm olaraq tanış edəcək. Bu layihənin həyata keçirilməsi Azərbaycan-Rusiya əlaqələrinin dinamik inkişafına və fasiləsiz informasiya mübadiləsinə artan tələbata parlaq sübutdur.

Qeyd etmək lazımdır ki, "RİA Novosti" artıq uzun müddətdir Azərbaycanda fəaliyyət göstərir. Oxucusuna daha yaxın olmaq və auditoriyasını genişləndirmək istəyən Rusiyanın "Novosti" informasiya agentliyi ilk dəfə olaraq Azərbaycan dilində "danışacaq".

Şübhəsiz, "Rusiyadan xəbərlər" əlavəsinin işıq üzü görməsi son vaxtlar "strateji tərəfdaşlıq" kimi səciyyələndirilən ikitərəfli münasibətlərin ümumi tendensiyalarını bariz şəkildə əks etdirir.

Rusiyada Azərbaycan ilinin və Azərbaycanda Rusiya ilinin keçirilməsi ikitərəfli münasibətlərin bütün spektrindən istifadə etmək üçün yaxşı imkanlar yaratmışdır. Hazırda Azərbaycan-Rusiya münasibətləri bir çox istiqamətlər (siyasi, ticarət-iqtisadi, mədəni, hərbi-texniki əməkdaşlıq, beynəlxalq terror təhlükəsinin qarşısının alınması kontekstində sərhəd qoşunlarının fəal işbirliyi, parlamentlərarası əlaqələrin fəallaşması) üzrə harmonik inkişaf edir.

Ölkələrimiz arasında siyasi dialoqun intensivliyi xeyli dərəcədə Azərbaycan və Rusiya prezidentləri İlham Əliyevlə Vladimir Putin arasında qarşılıqlı anlaşma, etimad və hörmətin səviyyəsi ilə müəyyən olunur.

Müntəzəm rəsmi və işgüzar səfərlər, qeyri-formal şəraitdə görüşlər, telefon əlaqələri dövlətlərimizin başçılarına ikitərəfli münasibətlərin ən aktual problemlərini operativ şəkildə müzakirə etmək, beynəlxalq məsələlərə dair mövqelərini razılaşdırmaq imkanı verir. Belə ki, hər iki ölkə Cənubi Qafqazda regional təhlükəsizliyin bərqərar edilməsi üçün birgə səy göstərir. Biz strateji sabitlik, qlobal çağırışların və təhdidlərin dəf edilməsi, regional münaqişələrin tənzimlənməsi məsələlərində yaxın mövqelərdən çıxış edirik. Bu kontekstdə Ermənistan-Azərbaycan, Dağlıq Qarabağ münaqişəsinin Azərbaycan Respublikasının ərazi bütövlüyü nəzərə alınmaqla beynəlxalq hüququn norma və prinsipləri əsasında həlli sahəsində ATƏT-in Minsk qrupu həmsədri kimi Rusiya Federasiyasının fəaliyyətinə böyük əhəmiyyət veririk.

Qarşılıqlı tərəfdaşlıq istəyimiz iqtisadi əməkdaşlıq sahəsində də böyük imkanlar açır. Rusiya Azərbaycanın əsas ticarət tərəfdaşıdır. Ölkələrimiz 2010-cu ilədək olan dövrdə uzunmüddətli iqtisadi əməkdaşlıq proqramını uğurla həyata keçirir.

2005-ci ildə Azərbaycan Respublikası ilə Rusiya Federasiyası arasında əmtəə dövriyyəsinin həcmi 1 milyard ABŞ dollarını ötmüşdür. Ticarət dövriyyəsinin yüksək artım sürəti bu il də davam edir: 2006-cı ilin yanvar-may aylarında əmtəə dövriyyəsinin həcmi 503,2 milyon dollar təşkil etmişdir ki, bu da 2005-ci ilin müvafiq dövründə olduğundan 1,4 dəfə çoxdur.

Rusiya şirkətlərinin ixrac məhsullarını və xidmətlərini Azərbaycan bazarına gətirmək, ticarət-iqtisadi əlaqələri fəallaşdırmaq və Rusiya ilə Azərbaycan arasında çoxplanlı mehriban qonşuluq münasibətlərini genişləndirmək məqsədilə 2006-cı il fevralın 21-dən 24-dək Bakıda "Rusiya və Azərbaycan: strateji tərəfdaşlıq" devizi altında Rusiya mallarının sərgisi təşkil olunmuşdur. Sərgi ilə eyni vaxtda ikinci Azərbaycan-Rusiya iqtisadi forumunun iclası keçirilmişdir. Sərgi və forum Rusiya Federasiyasının Prezidenti V.Putin və Azərbaycan Respublikasının Prezidenti İ.Əliyevin iştirakı ilə keçmişdir.

Azərbaycan Respublikası ilə Rusiya Federasiyası arasında iqtisadi əməkdaşlıq üzrə müştərək hökumətlərarası komissiyanın fəaliyyəti konkret praktik məsələlərin həllinə yönəlmişdir. 2006-cı il fevralın 21-də Bakıda komissiyanın 10-cu iclası keçirilmişdir. İclasda qarşılıqlı faydalı iqtisadi və elmi-texniki əlaqələrin genişləndirilməsinin, iqtisadi sahədə ikitərəfli razılaşmaların həyata keçirilməsinə nəzarətin gücləndirilməsinin konkret yolları və əməkdaşlığın digər aktual məsələləri müzakirə olunmuşdur.

Tərəflərin yanacaq-energetika sahəsində əməkdaşlığı davam edir. Rusiyanın "LUKoyl" neft şirkəti 12 ildir Azərbaycanda uğurla fəaliyyət göstərir. Tərəflər kimya, neft-kimya və nəqliyyat sahələrində uğurla əməkdaşlıq edir, aqrar-sənaye kompleksi sahəsində qarşılıqlı faydalı əlaqələrin- fəallaşmasına xüsüsi əhəmiyyət verirlər.

İncəsənət sahəsində mübadilələrə gəlincə isə, bunlar tamaşaçılara, dinləyicilərə və oxuculara yaxşı məlumdur. Rusiyanın məşhur teatrlarının, yaradıcı kollektivlərinin, ayrı-ayrı solistlərinin qastrolları Azərbaycanın mədəni həyatının vacib tərkib hissəsidir. Mübaliğəsiz deyə bilərəm ki, azərbaycanlı artistləri də Rusiyada məmnuniyyətlə qəbul edirlər.

Hazırda Azərbaycanda keçirilən Rusiya ili çərçivəsində rusiyalı artistlərin cavab qastrolları və bir sıra digər maraqlı tədbirlərin keçirilməsi nəzərdə tutulmuşdur. Bu yaxınlarda Bakıda ilk dəfə olaraq Beynəlxalq Rus kitabı festivalı keçirilmiş və bu, iki ölkənin mədəni həyatında əlamətdar hadisə olmuşdur.

Rusiya və Azərbaycan informasiya agentliklərinin, televiziya və radio şirkətlərinin əməkdaşlığı davam edir. Şübhəsiz, bir çox tarixi və geosiyasi səbəblərə, habelə Rusiyada çoxlu sayda azərbaycanlının yaşadığına görə Azərbaycan-Rusiya münasibətləri, bir növ, fenomen təşkil edir. Kiçik bir məqalədə oxucular üçün maraq doğura biləcək bütün mövzuları əhatə etmək çətindir. Bununla belə, ümid edirəm ki, Rusiyanın "Novosti" informasiya agentliyinin yeni əlavəsi məhz bu məqsədlərə - aktual problemlərin işıqlandırılmasına, düzgün informasiyanın verilməsinə və ən başlıcası, xalqlarımız arasında möhkəm siyasi əlaqələrin və çoxəsrlik dostluq münasibətlərinin əsaslanacağı və inkişaf edəcəyi ikitərəfli əməkdaşlığın dərinləşməsinə xidmət edəcək.

Azərbaycan.- 2006.- 5 noyabr.- S. 6.