Banu

Teatrların dirçəlmə dövrü başlayır

Gənc Tamaşaçılar Teatrının direktoru gənclərin bu sənət ocağına marağının artdığını söyləyir

Xəbər verdiyimiz kimi, Gənc Tamaşaçılar Teatrı Səttarxan adına Mədəniyyət və Texnika Sarayına köçüb. Teatrda təmir işləri başa çatanadək kollektiv 600 nəfərlik tamaşaçı salonu olan sarayda çıxış edəcək. Teatrın direktoru Mübariz Həmidovun sözlərinə görə, xeyli müddətdir istismara verilən Gənc Tamaşaçılar Teatrı bu günə qədər əsaslı təmir olunmayıb. O deyir ki, teatrın təmir olunması kollektivin çoxdankı arzusu imiş: "Çünki texniki avadanlıqlar, demək olar, ömrünü başa vurmuşdu. 5-6 il olardı ki, salonda istilik sistemi işləmirdi. Əsaslı təmir zamanı bu problemlər öz həllini tapacaq. Belə ki, teatrımız dünya standartlarına cavab verən şəkildə yenidən qurulacaq. Bütün texniki avadanlıqlar, səhnə texnologiyası, foye, teatrın xarici görünüşü büsbütün dəyişəcək, isti-soyuq rejimli sistem qurulacaq".

Teatrın direktoru əmindir ki, teatrda aparılan dəyişikliklərin yaradıcı proseslərə təsiri mütləq olacaq. Onun fikrincə, bundan sonra teatrın tamaşaçılara zəif tamaşa təqdim etməyə haqqı yoxdur. Buna baxmayaraq direktor teatrlarda tamaşaçı probleminin olduğunu inkar etmir. M.Həmidov deyir ki, yaxşı məhsulun alıcısı həmişə mövcuddur. Onun sözlərinə görə, yaxşı tamaşanın tamaşaçısı mütləq olmalıdır: "Əgər teatr tamaşaçılara zövqlü tamaşa təqdim edirsə, tamaşaçı gələcək. Belə olmazsa, olan-qalan tamaşaçını da itirə bilərik. Ancaq bizim teatrın daimi tamaşaçıları var. Daimi tamaşaçılarımız teatrın bütün repertuarını izləyirlər".

Buna baxmayaraq, teatr rəsmisi hesab edir ki, tamaşaçını teatra cəlb etmək üçün həmişə tədbirlər görmək lazımdır. Bunun üçün o reklam və təbliğat məsələlərinə diqqət yetirməyi vacib sayır. "Yanvar ayından mövsüm bağlanana qədər ayda 2-3 tamaşamızı reklam edirdik və bu zaman mən reklamın gücünü gördüm. Onu da qeyd etmək istəyirəm ki, artıq teatrların dirçəlmə dövrü başlayır. Yavaş-yavaş tamaşaçılar teatra gəlirlər. Əvvəllər deyirdilər ki, video, kompüter tamaşaçıları teatrdan uzaqlaşdırır. Çünki tamaşalara videoda baxırlar. Ancaq tamaşanı canlı görmək tamam başqadır. Mənə elə gəlir ki, tamaşaçılar, xüsusən də gənclər bunun fərqini artıq hiss edirlər", - deyə M.Həmidov bildirdi.

Teatrın direktoru söyləyir ki, tamaşaçı qıtlığına müəyyən mənada rejissor işi də təsir edir. O hər bir teatrın repertuar siyasətinin olmasının vacibliyini vurğulayaraq "repertuar teatrın simasıdır" - deyir. Gənc Tamaşaçılar Teatrında yaxşı rejissorların çalışdığını söyləyən müsahibim onların adlarını sadalayır. O xalq artisti Vaqif Əsədovun, əməkdar artist Rafıq Əliyevin, teatrın baş rejissoru Loğman Kərimovun, rejissor və aktyor Nicat Kazımovıın hazırladığı tamaşaların böyük maraqla qarşılandığını söyləyir.

Onunla söhbətdən öyrəndik ki, sənət ocağına həm də başqa teatrlardan rejissorlar dəvət edilir. Məsələn, Milli Dram Teatrının rejissoru Bəhram Osmanov yuxarıda adı çəkilən teatrda artıq 4 tamaşaya quruluş verib. Cəlil Məmmədquluzadənin "Danabaş kəndinin məktəbi" əsərinə quruluş vermək üçün Teatr Xadimləri İttifaqının sədri Azərpaşa Nemətov teatra dəvət edilib. Qeyd edək ki, bu yaxınlarda tamaşanın məşqlərinə başlanılacaq. Bundan başqa, planda yaxın xarici ölkələrdən teatra rejissor dəvət etmək də nəzərdə tutulub.

Aktyor truppasının əsasən gənclərdən ibarət olduğunu dilə gətirən müsahibim deyir ki, teatrda eyni zamanda orta və yaşlı nəsli təmsil edən kifayət qədər aktyor var. Onun sözlərinə görə, rəhbərlik etdiyi teatrda aktyor pafosundan əsər-əlamət yoxdur: "Bu teatrda ən zəif tamaşada ən zəif aktyor belə özündən asılı olmayaraq, tamaşanın ümumi ideyasına qulluq edir. Bizdə solo ifa, tərəf müqabilini eşitməmək, pafosla danışmaq və s. belə hallar yoxdur. Düzdür, 40-cı illərdən 60-cı illərə qədər səhnədə pafos hiss olunurdu. O zaman bunu dövr tələb edirdi. O dövrdə aktyor pafosla danışmasaydı, çox güman ki, ona baxan olmazdı. Amma Tofiq Kazımovun Milli Dram Teatrına gəlişilə tamaşalara lirik-psixoloji ovqat, təbiilik gəldi. Pafos yığışdırıldı. Tamaşadakı mahnıları müğənnilər deyil, aktyorlar özləri oxumağa başladılar".

Gələcək planlarından söhbət açan müsahibim söyləyir ki, görüləsi işlər çoxdur. Onun dediklərindən məlum oldu ki, teatr təmirlə əlaqədar əvvəlki ritmindən çıxdıgına gorə bir qədər gərginlik yaranıb. Buna baxmayaraq kollektiv noyabr ayında Bakı və Bakıətrafı kəndlərdə səyyar tamaşalarla çıxış etməyi planlaşdırır. Hətta xarici ölkələrə qastrol səfərlərinin nəzərdə tutulduğunu deyən M.Həmidov bildirdi ki, teatrın tarixi, repertuarı barədə məlumatlar məktubla Türkiyə və Rusiyanın ayrı-ayrı şəhərlərinə göndərilib.

Ayna.- 2006.- 11 noyabr.- S. 21.