Alim

Aylarla qapısı açılmayan kitabxanalar

Dünən Milli Məclisin mədəniyyət məsələləri daimi komissiyasının iclası keçirilib. İclasda 2007-ci il dövlət büdcəsindən mədəniyyət sahəsinə ayrılan vəsaitlə bağlı məsələ müzakirə edilib. Mədəniyyət işçilərinin əmək haqlarının aşağı olduğunu etiraf edən komissiyanın sədri Nizami Cəfərovun sözlərinə görə, mədəniyyətin ayrı-ayrı sahələrində vəziyyət ürəkaçan deyil.

Xüsusən kitabxanalarda çalışan işçilərin əmək haqlarının aşağı olması və yeni kitab alınması üçün ayrılan vəsaitin kifayət etməməsi bu sahədə bərbad vəziyyətin yaranmasına gətirib çıxarıb. Maliyyə Nazirliyinin idarə rəisi Xəqani Rzayev bildirdi ki, gələn ilin dövlət büdcəsində mədəniyyət, incəsənət, informasiya, bədən tərbiyəsi və digər sahələrə 90 milyon manat vəsaitin ayrılması proqnozlaşdırılır. Bu göstərici ötən ilin dövlət büdcəsi ilə müqayisədə 19,4 milyon manat, yaxud 27,5 faiz çoxdur. Həmin vəsaitin 77 milyon manatı mədəniyyət, incəsənət və kütləvi informasiya vasitələrinin fəaliyyətinə yönəldiləcək. Bu isə ötən ilə nisbətən 5,8 milyon manat çoxdur. Dövlət büdcəsindən maliyyələşən mədəniyyət sahələrində çalışan işçilərin əmək haqlarının artırılmasına isə 271 milyon manat vəsaitin ayrılması nəzərdə tutulur ki, bu, 630 min nəfərə şamil ediləcək. Pekində keçiriləcək 27-ci yay olimpiadasında iştirak etmək üçün təlim məşqlərinə isə 5,8 milyon manat vəsaitin ayrılması gözlənilir. Kinostudiyanın bərbad vəziyyətdə olduğunu diqqətə çatdıran Kinematoqrafçılar İttifaqının katibi Abbas Əliyevin fikrincə, mədəniyyət sahəsinə 25 faiz artımla kinostudiyanı bərpa etmək mümkün olmayacaq. Çünki kinostudiyaya ictimai təşkilatlar kimi subsidiya ayrılmır. Mədəniyyətə münasibətdə fəlsəfənin dəyişdirilməsini vacib sayan deputat Rəfael Hüseynovun bildirdiyinə görə, mədəniyyət sahəsinə ayrılan vəsait onun çəkisinə uyğun olmalıdır. Mədəniyyət bazar münasibətlərinə uyğunlaşdırıldığından bu sahəyə ayrılan vəsait gəlir gətirmir. Ona görə heykəltəraşlıq, rəssamlıq, kitabxanaçılıq və animasiya sahələrini yaşatmaq üçün onlara ayrılan vəsaitin həcmini artırmaq lazımdır: "Elə kənd kitabxanaları var ki, onların qapısı aylarla açılmır. Ölkədəki 5000-ə yaxın kitabxananın əksəriyyəti bərbad vəziyyətdədir. Kitabxana işçisinə, kitabxanaya münasibət millətin gələcəyinə münasibətdir. Ona görə bu sahəyə diqqət artırılmalıdır". Mədəniyyət və Turizm nazirinin müavini Ədalət Vəliyev qeyd etdi ki, son üç ildə nazirliyin nəzdində olan bütün kitabxana və klublar əsaslı və cari təmir edilib. Buna baxmayaraq, indiyə kimi 30-40 kitabxana evlərdə fəaliyyət göstərir. Hazırda həmin kitabxana və klublar üçün yeni binaların tikilməsi planlaşdırılır. Müzakirələrdən sonra qanun layihəsinin MM-ə göndərilməsi tövsiyə olundu.

Olaylar.- 2006.- 2 noyabr.- S. 8.