İçərişəhərin tarixi abidələrinin inventarlaşdırılmasına həsr olunmuş tədbir

AzərTAc xəbər verir ki, noyabrın 3-də Azərbaycan Memarlıq və İnşaat Universitetinin (AzMİU) və ABŞ-ın Minnesota Universitetinin birgə təşkilatçılığı ilə "Dünya irsi abidəsi Bakı İçərişəhərinin tarixi tikililərinin inventarlaşdırılması" layihəsinə həsr olunmuş tədbir keçirilmişdir.
Layihənin rəhbəri, Minnesota Universitetinin professoru Artur Çen, layihənin Azərbaycan üzrə əlaqələndiricisi, AzMİU-nun dosenti Səbinə Hacıyeva, digər natiqlər sənədin əhəmiyyəti və onunla bağlı görülən işlər barədə məlumat vermişlər.
Qeyd olunmuşdur ki, layihə YUNESKO-nun dəstəyi ilə AzMİU və Minnesota Universiteti kollektivləri tərəfindən həyata keçirilir.
Azərbaycanda İçərişəhərin genişmiqyaslı tədqiqatı ilə məşğul ola biləcək menecment-planlar və sair tərtib edəcək təşkilat yaradılmışdır. 2005-ci ilin dekabrından başlayaraq 2006-cı ilin noyabrında tamamlanmalı olan layihə üzrə görülən işlər Bakıda İçərişəhər üçün əsas üstünlük təşkil edən YUNESKO-nun "inteqrallaşmış inventarlaşma və kart inkişafı və menecment planı" tövsiyələrinə cavab verir.
Layihənin yekun nəticələri İçərişəhərin menecment planının tərtibi zamanı istifadə üçün Mədəniyyət və Turizm Nazirliyinə təqdim olunacaqdır.

Azərbaycan.- 2006.- 4noyabr.- S.6.