Rəşad
Prezident Təzəpirin təmiri ilə maraqlanıb
İlham Əliyev tapşırıqlarını
və tövsiyələrini verib
Dünən Azərbaycan
prezidenti İlham Əliyev Təzəpir məscidi və onun ərazisində aparılan təmir-tikinti və abadlıq işləri ilə
Üç korpusdan ibarət olacaq yeni kompleksin mərkəzində 900 kvadratmetrlik konfrans salonu tikiləcək. Qurbangah, namazgah və yardımçı otaqlar da olacaq. Dördmərtəbəli kompleksin ümumi sahəsi 40 min kvadratmetrdir. "İnam H" şirkəti tərəfindən hazırda 6 min kvadratmetr ərazidə tikinti işləri yerinə yetirilir. İlham Əliyev əvvəlcə Təzəpir məscidinin daxilində aparılacaq təmir işləri ilə maraqlanıb, milli memarlıq üslubunda hazırlanmış ayrı-ayrı layihələrə baxıb. Dövlət başçısına məlumat verilib ki, məscidin daxilindəki əsas çilçırağın çəkisi çox ağır olduğu üçün dəyişdiriləcək, işıqlandırılma sistemi müasir üslubda qurulacaq. Tavan və divar suvaqları ilkin memarlıq nümunələri saxlanılmaqla, yeni texnologiyalar əsasında müasirləşdiriləcək, "Qurani-Kərim"in ayələrindən yazı-naxışlar, xüsusi dini emblemlər və rəmzlərlə bəzədiləcək. Qapı-pəncərələr də dəyişdiriləcək. Qeyd edilib ki, 1926-cı ildən məscid kinoteatr kimi istifadə olunduğu üçün binanın daxili quruluşu dəyişdirilib, qədimilik əlamətləri itib. Ölkəmiz müstəqilliq qazandıqdan sonra məscid bir neçə dəfə təmir edilib, lakin Bakıda baş vermiş sonuncu güclü zəlzələ nəticəsində divarlarda çatlar əmələ gəlib. İlham Əliyev məscidin bütünlüklə əsaslı təmir olunmasının, işıqlandırma sisteminin milli üslub qorunub saxlanılmaqla dəyişdirilməsinin zəruriliyini bildirib. Sonra prezident məscidin ərazisində aparılan tikinti işlərinin gedişi ilə maraqlanıb. Şeyxülislam Allahşükür Paşazadə prezidentin milli, mənəvi və İslami dəyərlərin qorunub saxlanılmasına, ölkəmizdə dini ocaqlara diqqət və qayğısını yüksək qiymətləndirib. Eyni zamanda şeyx bildirib ki, Qafqaz Müsəlmanları İdarəsinin burada yerləşən əvvəlki binası, mədrəsə və ətrafdakı bəzi evlər sökülüb. Üç aydan artıqdır inşaat işləri aparılır. Bütün işlər 2008-ci ilin birinci rübünədək başa çatdırılacaq. Təmir-tikinti işlərinə 8,2 milyon dollar sərf olunacaq. Sonda İlham Əliyev Təzəpir məscidinin ümumi görünüşünun xüsusi əhəmiyyət daşıdığını vurğulayaraq, məscidin günbəzinin yenidən qurulması, bu istiqamətə gələn əsas yolların genişləndirilməsi, müasir işıqlandırma sistemi ilə təmin olunması, ətrafdakı bəzi sakinlərin köçürülməsi və abadlıq işlərinin aparılması üçün Bakı şəhər İcra Hakimiyyətinin rəhbərliyinə müvafiq tövsiyə və tapşırıqlarını verib.
Şərq.- 2006.- 22 sentyabr.- S. 2.