Banu

Məscidlərimiz təmir olunur

Lakin qədim arxitekturanın mühafizə edilməsi məqsədilə onların fasadında dəyişiklik edilməyəcək

2008-ci ilin axırına kimi Bibiheybət, Təzəpir və Əjdərbəy məscidlərində təmir işləri başa çatdırılacaq. Memar Ədalət Məmmədovun sözlərinə görə, Təzəpir məscidinin həyətində kiçik evlər sökülüb və orada Qafqaz Müsəlmanları İdarəsi üçün yeni binanın tikintisinə başlanılıb. O bildirdi ki, idarə üçün tikilən 4 mərtəbəli binanın hündürlüyü 12 metrdən artıq olmayacaq. Beləliklə Təzəpir məscidinin ətrafdan görünüşünə heç bir problem yaranmayacaq. Yeni binada muzey və kitabxana da fəaliyyət göstərəcək.
Bibiheybət məscidində aparılan işlər barədə söhbət açan Ə.Məmmədov bildirdi ki, burada bərpa işlərinin böyük bir hissəsi başa çatdırılıb. Bu zaman məscidin interyeri xeyli gözəlləşdirilib. Bibiheybət məscidinin ətrafındakı yaşayış evləri köçürülüb. Həmin evlərin yerləşdiyi sahənin altında ziyarətçilərə xidmət üçün böyük bir yeraltı kompleks istifadəyə verilib. Binaların yerləşdiyi ərazidə isə böyük bir açıq meydan düzəldilib. Gələcəkdə Bibiheybətin yaxınlığından keçən yolun genişləndirilməsi də nəzərdə tutulub.
Ə.Məmmədov bildirdi ki, Əjdərbəy məscidində aparılacaq təmir-bərpa işlərinin layihəsi də hazırlanıb və işlərə başlanılıb. Layihəyə əsasən, məscidin həyəti və binası paralel və perpendikulyar sütunlarla birləşdiriləcək. Kompleksin ortasında isə böyük bulaq tikiləcək. Bulağın üstü Məkkədə olduğu kimi xüsusi örtüklə örtüləcək və bununla məscidin həyəti ətrafdakı çoxmərtəbəli binalardan təcrid olunacaq. Əjdərbəy məscidinin minarələri də yenidən qurulacaq. Daha doğrusu, minarənin gümbəzinin üzərinə sonradan əlavə olunmuş komponentlər çıxarılacaq və onların altındakı qədim yazılar bərpa olunacaq. Həm Əjdərbəy, həm də Təzəpir məscidlərində fasadda heç bir yeniliklər edilməyəcək. Memarlar bununla binaların qədim arxitekturasını qoruyub saxlamaq niyyətindədirlər. Müasir texnologiyalar isə yalnız binanın içində aparılan işlərdə istifadə olunacaq.

Ayna.-2006.- 8 sentyabr.- S. 8.