Tarixi adlar və onlarla baglı xüsusi işarələrin istifadəsi qaydaları haqqında əmr imzalanıb

Mədəniyyət və Turizm naziri Əbülfəs Qarayev "Azərbaycan xalqının tarixi adları, tarixi-mədəni sərvətlərinin adları və onlarla bağlı xüsusi işarələrin hüquqi və fiziki şəxslər tərəfindən istifadəsinə icazə verilməsi qaydaları" haqqında əmr imzalayıb. Nazirliyin mətbuat xidmətindən verilən məlumata görə, bu qaydalar Azərbaycan Respublikasının qanunlarına, Mədəniyyət və Turizm Nazirliyi haqqında Əsasnaməyə uyğun olaraq hazırlanıb. Azərbaycan xalqının tarixi adları, tarixi-mədəni sərvətlərinin adları və onlarla bağlı xüsusi işarələrdən əmtəə nişanı kimi istifadə etmək üçün icazə almaq istəyən fiziki, yaxud hüquqi şəxs müvafiq ərizə ilə nazirliyə müraciət etməlidir. Ərizə ilə bərabər əmtəə nişanının eskizi və əmtəə nişanından istifadə edilməklə istehsal olunan məhsulun və ya xidmətlərin siyahısı da təqdim olunmalıdır. Qeyd olunan adlar və xüsusi işarələrdən əmtəə nişanı kimi istifadə edilməsinə icazə verilməsi barədə qərar nazirliyin nəşriyyat, reklamın təşkili və informasiya şöbəsinin ekspert reyindən sonra qəbul olunacaq və istifadəçiyə müvafiq icazə sənədi veriləcəkdir. Bu qaydalar qəbul edilənədək tarixi-mədəni sərvətlər əsasında hazırlanmış mövcud əmtəə nişanlarından istifadə hüququ "Əmtəə nişanları və coğrafi göstəricilər haqqında" qanuna uyğun olaraq ləğv edilir.

Yeni Azərbaycan.- 2006.- 1 sentyabr.- S. 8.