Kübra

Azərbaycana turist axnı başlayıb

Ölkəyə gələn 1 milyon 300 mindən çox xarici vətəndaşın 900 mini turistdir.

Azərbaycanın dinamik şəkildə inkişaf edən iqtisadiyyatı bütün dünyanın diqqət mərkəzindədir. Bu inkişaf müxtəlif sahələrə də, öz növbəsində təsirini göstərməkdədir. Bu sahələrdən biri də, turizmin inkişafı və ölkəyə turist axınının təmin edilməsi istiqamətində görülən işlərdir.

Təsadüfi deyil ki, son bir neçə il ərzində ölkəyə turist axını sürətlə artır. Abşeronda və müxtəlif turizm resurslarına malik olan regionlarda bu sahənin inkişafı üçün konkret dövlət proqramlarının həyata keçirilməsi sözügedən inkişafa daha da, təkan vermiş olur. Çünki Azərbaycanda turizmin inkişafı üçün təbii resurslar kifayət qədərdir. Bu fakt onu göstərir ki, . Azərbaycan nəinki regionda, həm də, beynəlxalq aləmdə tanınır və öz nüfuzunu möhkəmləndirir. Bütün bunlar rəsmi statistik məlumatlarda da əks olunur.

Xatırladaq ki, bu il Azərbaycana gələn xarici vətəndaşların sayı 1 milyon 300 mindən çox olub. Onların 900 mindən çoxu turist kimi səyahətə gələnlərdir.

Bu barədə jurnalistlərə verdiyi açıqlamasmda Mədəniyyət və Turizm naziri Əbülfəs Qarayev bildirib. Nazirin məlumatına görə, əvvəllər Azərbaycana gələn turistlərin sayı gedənlərin 30-40 faizini təşkil edirdi: "İndi isə, rəqəmlər bərabərləşməyə doğru gedir. Artıq Azərbaycana bu ilin birinci yarısında 1 milyon 300 mindən çox adam gəlib, onlardan 926 minini turist adlandıra bilərik. Əgər yarım ildə bu qədər qonağımız olubsa, deməli, ilin sonuna kimi bir o qədər də turistin gələcəyi gözlənilir. Azərbaycanın tarixində ilk dəfədir ki, rəqəmlər bu səviyyəyə çatıb".

Ölkədən xarici ölkələrə gedənlərə gəlincə isə, Ə.Qarayev deyib ki, 1 milyon 400 min Azərbaycan vətəndaşı xaricə səfər edib: "Azərbaycana Avropa və ABŞ-dan, Ərəb ölkələrindən, Türkiyə və Rusiyadan gələnlərin sayı artıb. Azərbaycandan isə, böyük əksəriyyət Türkiyə, Rusiya, MDB ölkələri və Dubaya üz tutur".

Səs.- 2006.- 6 sentyabr.- S. 8.