İlham Əliyev İslam Konfransı və Ümumdünya Turizm təşkilatlarının rəhbərlərini qəbul edib

Azərbaycan prezidenti İlham Əliyev dünən İslam Konfransı Təşkilatının (İKT) baş katibi Əkmələddin İhsanoğlunu qəbul edib. Prezidentin mətbuat xidmətindən APA-ya verilən məlumata görə, Ə.İhsanoğlu Azərbaycanın İKT-də çox fəal iştirak etdiyini, ölkəmizdə bu nüfuzlu təşkilatın böyük tədbirlərinin keçirilməsini Azərbaycanın beynəlxalq aləmdə artan və möhkəmlənən mövqeyi ilə əlaqələndirib.

İ.Əliyev isə bu yaxınlarda İstanbulda İKT-nin Əməkdaşlıq və Dialoq Uğrunda Gənclər Forumunun daimi qərargahının açılışı mərasimində iştirakını xatırladıb, bu təşkilat çərçivəsində əməkdaşlığın daha da genişləndirilməsinin zəruriliyini vurğulayıb. Dünən Azərbaycan prezidenti, həmçinin, Ümumdünya Turizm Təşkilatının (ÜTT) baş katibi Françesko Frangiallini də qəbul edib. ÜTT-nin baş katibi İKT üzvü olan ölkələrin turizm nazirlərinin V Konfransının Azərbaycanda keçirilməsinin böyük əhəmiyyət daşıdığını bildirib.

Öz növbəsində, prezident İ.Əliyev ÜTT baş katibinin ölkəmizə səfərinin turizmin inkişafı ilə əlaqədar Azərbaycanda görülən işlərlə yaxından tanış olması üçün yaxşı imkan yaratdığını söyləyib. Dövlət başçısı İKT ölkələri turizm nazirlərinin V Konfransının önəmini xüsusi vurğulayıb, ÜTT ilə Azərbaycan arasında əməkdaşlığın bundan sonra genişlənəcəyinə ümidvar olduğunu bildirib.

525-ci qəzet.- 2006.- 12 sentyabr.- S. 3.