İlham Əliyev Pakistan, Türkiyə və Səudiyyə Ərəbistanı Krallığının turizm qurumlarının rəhbərlərini qəbul edib

Dünən Azərbaycan Prezidenti İlham Əliyev Pakistan İslam Respublikasının turizm naziri xanım Nilufər Bəxtiyarı qəbul edib. Qonaq Azərbaycana ilk dəfə səfər etdiyini və bundan çox böyük məmnunluq hissi keçirdiyini söyləyib. Nazir Prezident İlham Əliyevin Pakistana rəsmi səfərini xatırladaraq bu səfərin çox uğurla keçdiyini vurğulayıb. İlham Əliyev isə ölkələrimiz arasında əlaqələrin müxtəlif sahələrdə uğurla inkişaf etdiyini söyləyib və əmin olduğunu bildirib ki, Azərbaycanın və Pakistanın turizmlə məşğul olan qurumları arasında da bu əlaqələr daim genişlənəcək.

Azərbaycan Prezidenti dünən, həmçinin, Türkiyənin Mədəniyyət və Turizm naziri Atilla Koç və Səudiyyə Ərəbistanı Krallığının Ali Turizm Təşkilatının Baş katibi Sultan bin Salman bin Əbdüləziz Al Səudu də qəbul edib. Nazir Atilla Koç bir neçə il bundan əvvəl Bakıda olduğunu, ötən son illər ərzində ölkəmizdə çox böyük inkişafın baş verdiyini bildirib. O, İKT ölkələri turizm nazirlərinin V Konfransının Azərbaycanda yüksək səviyyədə təşkil edildiyini və bu mötəbər tədbirin əhəmiyyətini vurğulayıb. Sultan bin Salman bin Əbdüləziz Aİ Səud də Bakıda yüksək səviyyədə təşkil edilən konfransın əhəmiyyətini qeyd edib. Dövlət başçısı İlham Əliyev respublikamızda gedən inkişaf proseslərindən qonaqlara məlumat verib. Azərbaycan Prezidenti nazirlərin bu səfərini, İKT-nin Bakıda keçirilən tədbirində iştirak etməsini ölkəmiz haqqında daha geniş və dolğun məlumat almaları üçün gözəl fürsət kimi dəyərləndirib. Görüşdə ölkələrimizin müvafiq qurumları arasında əlaqələrin bundan sonra da genişlənəcəyinə əminlik ifadə olunub.

Yeni Azərbaycan. -2006.- 12 sentyabr.- S. 2.