Əsədov B.

Bu gün Bakıda turizm nazirlərinin V islam konfransı işə başlayır

Bu gün Bakının "Gülüstan" sarayında İslam Konfransı Təşkilatının üzvü olan ölkələrin turizm nazirlərinin V konfransı işə başlayır. Əvvəlcədən hazırlanmış proqrama əsasən sentyabrın 9-da və 10-da qırxa yaxın ölkənin yüksək rütbəli ekspertləri konfransın gündəliyini və imzalanacaq sənədlərin layihələrini hazırlayacaqlar. Sonrakı iki gündə isə nazirlər görüşəcək, öz dövlətlərinin turizm potensialı haqqında məlumat verəcək, fikir mübadiləsi aparacaqlar. Müzakirələrdə əsas məsələ turizm sahəsində əməkdaşlığın inkişaf etdirilməsi olacaq. Konfransda Ümumdünya Turizm Təşkilatının Baş katibi Françesko Franjiallinin, habelə İKT-nin, İKT-də və beynəlxalq təşkilatlarda müşahidəçi ölkələrin rəsmi nümayəndələrinin iştirakı da gözlənilir.
Bu mötəbər toplantı üçün Bakının seçilməsi təsadüfi deyil. Ölkəmiz həmişə gəzib-görməli yerləri ilə turistlərin diqqətini cəlb edib. Azərbaycan özü kimi vüqarlı uca dağları, dərin qobuları, laləzar vadiləri, mənzərəli düzəngahları, alp çəmənlikləri, qızıl qumlu çimərlikləri, gur sulu çayları, mavi gölləri, füsunkar meşələri, yaşıl ormanları, memarlıq, təsviri incəsənət abidələri, tətbiqi xalq sənəti, ədəbiyyat, musiqi və teatr mədəniyyəti, faydalı qazıntıları, palçıq vulkanları, rəngarəng flora və faunası, subtropik zonası ilə tanınan diyardır. Bu diyara təşrif buyuranlar, onu səyahətə çıxanlar hər zaman səmimi mehribanlıqla, əsl mehmanpərvərliklə qarşılanır, unudulmaz, ömüruzadan günlər yaşayır, özlərinə sədaqətli dostlar qazanırlar. Bu ilin əvvəlindən respublikamız rekord sayda - bir milyona qədər turist qəbul edib, ilin axırınadək daha 300 min nəfər "qapımızı" döyə bilər. Qonaqlarımızın hamısına ürəkdən deyirik:
- Azərbaycana xoş gəlibsiniz, həmişə siz gələsiniz!
Turizm ölkənin və regionların sosial, eyni zamanda iqtisadi inkişafında mühüm rol oynayır. İstər ulu öndər Heydər Əliyevin 2002-ci il avqustun 27-də təsdiqlədiyi turizmin inkişafına dair (2002-2005-ci illər) Dövlət Proqramında, istərsə də cənab Prezident İlham Əliyevin 11 fevral 2004-cü il tarixli fərmanı ilə təsdiq edilmiş regionların sosial-iqtisadi inkişafına dair Dövlət Proqramında da bu, öz əksini tapıb. Artıq hər iki sənəddə turizm ilə bağlı müəyyən olunmuş tədbirlər əsasən yerinə yetirilib. İndi dövlət başçısının tapşırığı ilə turizm sənayesinin gələcək inkişafına yönəldilmiş yeni konsepsiya hazırlanır. Mədəniyyət və Turizm Nazirliyi kollegiyasının qərarı ilə xüsusi işçi qrupunun üzərində çalışdığı "2007-2016-cı illərdə Azərbaycanda turizmin inkişafı Proqramı"nda daxili turizm şəbəkəsini genişləndirmək, əcnəbi turistlər üçün maksimum yaxşı şərait yaratmaq nəzərdə tutulur. Məqsəd ölkəyə turist axınını gücləndirmək və bundan faydalanmaqdır. Əlbəttə, biz Fransa (ildə 75 milyon turist qarşılayır), İspaniya (52,5 milyon), ABŞ (40,4 milyon), İtaliya (39,6 milyon), Çin (33 milyon) və Böyük Britaniya (24,8 milyon) kimi turist dövlətləri ilə rəqabət apara bilmərik. Turizm sahəsindən gəlirdə də onlara çatmağımız imkan xaricindədir. Məsələn, Böyük Britaniya xarici turistlərdən hər il 19,4 milyard dollar qazanır, Azərbaycanda isə bu il ən yaxşı halda 80 milyon dollar gəlir götürüləcək. Əgər ABŞ-da hər turist ölkədə olduğu müddətdə 1600, Almaniyada 1250, İtaliyada və İspaniyada 790, Avstriyada 700, Çində 520 dollar xərcləyirsə, Azərbaycanda bu göstərici heç dilə gətiriləsi deyil. Gərək elə edək ki, ölkəmizə daha çox turist gəlsin, turizmdən gəlirimiz daha da artsın. Bunun üçün ilk növbədə hazırda 205 nəfər hüquqi və fiziki şəxsin məşğul olduğu turizm biznesinin bütün potensial imkanlarını üzə çıxarmaq, onun zəif yerlərini öyrənmək, əsas istiqamətlərini müəyyənləşdirmək lazımdır.
Bütün dünyada turizm xidmətlərinin qiyməti ildən-ilə artır. Əsas səbəb müasir turist mehmanxanalarının qıtlığıdır. Bu problem Azərbaycan üçün xüsusilə aktualdır. 1995-2002-ci illərdə mehmanxana müəssisələrinin sayı xeyli azalmışdı. Son dörd ildə bu sahədə ciddi dönüş edilib. Təkcə 2006-cı ilin əvvəlindən ölkədə səkkiz mehmanxana istifadəyə verilib və daha iyirmisi tikilir. Dövlət başçısı İlham Əliyevin fərmanı ilə mehmanxana və mehmanxana tipli obyektlərə lisenziya verilməsi Mədəniyyət və Turizm Nazirliyinə tapşırılıb. Yeni standartlar əsasında artıq yeddi mehmanxana və mehmanxana tipli obyekt təsnifatdan keçib. Bütövlükdə isə təsnifatdan keçən və "ulduz" alan qırx mehmanxanamız var. Amma tək mehmanxana ilə iş bitmir. Daxili turizmin iqtisadi səmərəsini yüksəltmək üçün nəqliyyat, mədəniyyət, xalq sənəti, ictimai iaşə, ticarət, rabitə və digər infrastrukturlar da inkişaf etdirilməlidir.
Bunlar öz yerində. İndi hər yerdə ekoturizmə maraq artır. Turistlər rahat otellərdən və standart servisdən daha doyublar. Onlar müəyyən tələblərə riayət etməklə (məsələn, cığırdan kənara çıxmamaq, tonqal qalamamaq, heç nəyə əl vurmamaq şərti ilə) təbiətin qoynunda - biosfer ərazidə (və ya qoruqda, milli parkda) dincəlməyə üstünlük verirlər. Ekoturizm beləcə təbiətin mühafizəsinə yardımçı olur, həm də yeni iş yerləri açılmasına kömək göstərir. Bir vaxt bəzi ölkələrin qoruq yerlərində əhali çox pis iqtisadi şəraitdə yaşayırdı. Məhz ekoturizm həmin yerlərdə natural təsərrüfatın inkişafına səbəb olub, yerli sakinlər qonaqları ekoloji cəhətdən təmiz, köhnə reseptlərlə hazırlanan pendir, yağ və digər qida məhsulları ilə təmin edirlər. Gid-bələdçilər də yerli sakinlərdir, xalq sənəti ustaları ekoturistlərin timsalında yeni müştərilər tapıblar, düzəltdikləri məmulatı uzağa getmədən, necə deyərlər, evin içindəcə xırıd edirlər.
Zəngin təbii potensiala malik ölkələr sırasında olan Azərbaycanda da turizmin bu sahəsini inkişaf etdirmək üçün hər cür imkan var. Bu baxımdan Ekologiya və Təbii Sərvətlər Nazirliyinin ekoturizmin inkişafı çərçivəsində milli parklara turist səfərləri təşkil etmək təşəbbüsü təqdirəlayiqdir. Bu gün ölkədə altı milli park, 14 dövlət təbiət qoruğu və 20 xüsusi mühafizə olunan zona mövcuddur. Artıq onlara daxil olmaq üçün buraxılış biletlərinin eskizləri hazırdır, hər biri haqqında bukletlər tərtib edilib. Gələcəkdə milli parkların yanında turistlər üçün informasiya mərkəzləri yaratmaq, məişət müəssisələri və müxtəlif xidmət obyektləri açmaq planlaşdırılır. Fiziki və hüquqi şəxslərlə bu barədə müqavilələr bağlanılacaq, əldə edilən vəsait parkların fonduna köçürüləcək. Hər şey ediləcək ki, ekoturistlər yaxşı dincəlsinlər, səfərlərindən razı qalsınlar.
...İndi isə bu il Azərbaycana səyahətə gələcək milyonuncu turistin yolunu gözləyirik. Bəlkə də bu, turizm nazirlərinin V islam konfransının işlədiyi günlərə təsadüf etdi. Hər kimdirsə xoş gəlir, səfa gətirir.

Azərbaycan.-2006.-9 sentyabr.- S. 6.