Xatirə

İKT-nin TURİZM KONFRANSI ÖLKƏYƏ NƏ VERƏCƏK?

İslam Konfransı Təşkilatına (İKT) üzv ölkələrin turizm nazirlərinin Bakıda keçirilən V konfransı başa çatdı. Xatırladaq ki, bu, sözügedən təşkilatın Bakıda təşkil olunan ikinci böyük tədbiridir. Bundan bir qədər əvvəl İKT xarici işlər nazirlərinin toplantısı keçirilmişdi.
Bu dəfəki toplantıda Azərbaycanda turizm imkanlarından bəhs olundu, islam ölkələri bura sərmayə qoymağa çağırıldı. Bəs, konfransın Azərbaycanın və ölkədə turizm sahəsinin inkişafında hansısa rolu olacaqmı?
Politoloq Hikmət Hacızadə tədbirin Bakıda keçirilməsini əhəmiyyətli hesab edir: “İslam ölkələrinin potensialından istifadə etmək lazımdır. Konfransda islam ölkələri ölkəyə investisiya qoymağa çağırıldı. Baxaq, görək, bu addımı atacaqlar, yoxsa yox”. Hikmət bəy bu cür tədbirlərin bilavaistə reklam xarakteri daşıdığını söylədi. Onun fikrincə, bu tədbirin turizmin inkişafında müəyyən rolu ola bilər.
Dini Etiqad və Vicdan Azadlıqlarını Müdafiə Mərkəzinin rəhbəri Hacı İlqar İbrahimoğlu Azərbaycanda artıq İKT-nin  bir neçə tədbirinin keçirilməsini təqdirəlayiq hesab edir. Onun sözlərinə görə, ölkənin islam dünyasına inteqrasiyası əhəmiyyətlidir: “Bu, əslində Azərbaycanın milli-mənəvi dəyərləri, əsrlərdən gələn islami məfkurəsi ilə bağlıdır. Sovetlər birliyindən sonrakı mərhələdəki intibah prosesinin məntiqi nəticəsidir. Nəzərə almaq lazımdır ki, Qarabağ problemi ilə bağlı səsvermələr və bu kimi digər məsələlərdə bu ölkələrin birgə çıxış etmələri Azərbaycanın xeyrinədir”.
İlqar bəy konfransda müzakirəyə çıxarılan sağlam istirahətin təşkili, bu sahədə müsəlman ölkələri arasında əməkdaşlıq, o cümlədən abidələrin qorunması, xüsusilə işğal olunmuş ərazilərdə abidələrimizin dağıdılması məsələlərini önəmli hesab edir: “Məncə, müsəlman ölkələri öz aralarında ümumi islami irsin birgə qorunması məsələlərində qarşılıqlı öhdəlik götürməlidirlər. Məscidlərin, islam abidələrinin qorunması məsələlərində öhdəliyin götürülməsi zəruri məsələdir”.
Konfransın turizmin inkişafında roluna gəlincə, İlqar bəy hesab edir ki, bu cür tədbirlərin dərhal faydaları olmur. Bunlar uzunmüddətli perspektivə hesablanır: “Turizmə gəlincə, bu, ölkədə problemli məsələlərdən biridir. Azad iqtisadiyyatın olmadığı, monopoliyanın hökm sürdüyü, bərabər, sərbəst imkanların olmadığı bir mühitdə sağlam turizmin inkişafı çətin məsələdir. Bu da artıq daxili problemimizdir. Bunun da həlli vətəndaş cəmiyyəti quruculuğundan, ölkədəki normal ab-havanın yaradılmasından keçən bir prosesdir”.

Musavat.-2006.-14 sentyabr.- S. 3.