İKT-nin üzvü olan ölkələrin turizm nazirlərinin Bakı konfransı başa çatdı

İslam Konfransı Təşkilatının üzvü olan ölkələrin turizm nazirlərinin V konfransı sentyabrın 12-də Bakı Bəyannaməsi və qətnamə qəbul edilməsi ilə başa çatmışdır.
Mədəniyyət və turizm naziri Əbülfəs Qarayev jurnalistlərə bildirmişdir ki, bəyannamənin mətninə ermənilərin Azərbaycanın işğal olunmuş torpaqlarında təbii ehtiyatları talaması, mədəniyyət və tarix abidələrini dağıtması, yanğınlar törətməsi, habelə Ermənistan ərazisindəki islam mədəniyyət və tarix abidələrini məhv etməsi kimi əməllərini qətiyyətlə pisləyən bənd salınmışdır. Nazir bu sənədin belə redaksiyada qəbul edilməsini dünya turizm sənayesinin erməni faşizminin əsl niyyətlərini açıb göstərən ciddi çağırışı kimi qiymətləndirmişdir.
Forumda növbəti, VI konfransı 2008-ci ildə Suriyada keçirmək qərara alınmışdır.
Pakistanın turizm naziri Nilufər Bəxtiyar və forumun digər iştirakçıları yekun iclasında çıxış edərək qonaqpərvərliyə və konfransın işinin yaxşı təşkilinə görə Azərbaycan tərəfinə təşəkkürlərini bildirmişlər.
***
Konfrans başa çatdıqdan sonra Azərbaycan Mədəniyyət və Turizm Nazirliyi adından forum iştirakçılarının şərəfinə Yaxt-klubda qəbul təşkil edilmişdir. Qəbul atəşfəşanlıqla başa çatmışdır.

Azərbaycan.-2006.-13 sentyabr.- S. 4.