Qasımlı İ.

"Azərbaycanda turizm infrastrukturunun möhkəmlənməsinə böyük vəsait qoyulacaq"

İKT turizm nazirlərinin V konfransına qatılan Prezident İlham Əliyev bildirib ki, Azərbaycanın təbii şəraiti turizmin inkişafı üçün şərait yaradır

İslam Konfransı Təşkilatının (İKT) turizm nazirlərinin Bakıda keçirilən V konfransı dünən öz işinə başlayıb. Mərasimə prezident İlham Əliyev də qatılıb. Azərbaycanın turizm imkanlarını əks etdirən filmin nümayişindən və Müqəddəs Quran ayələri oxunduqdan sonra rəsmi hissə başlayıb. Prezident İIham Əliyev İKT-nin xarici işlər nazirlərinin toplantısından sonra bildirib ki, konfransın Bakıda keçirilməsini əlamətdar hadisə kimi qiymətləndirib və bunun xüsusi əhəmiyyət daşıdığını bildirib. Onun sözlərinə görə, İKT qurumlarının Bakıda toplantılar keçirməsi bu təşkilatla Azərbaycan arasında əlaqələri daha da fəallaşdırır. Prezident deyib ki, bununla Azərbaycan həm də İKT-nin inkişafına öz töhfəsini verir, çünki Azərbaycan İKT ilə əlaqələrin möhkəmlənməsinin tərəfdarıdır.

"İslam Konfransı Təşkilatı gücləndikcə, dünyada gedən proseslərə daha fəal təsir edəcək. Bu təşkilatın nüfüzu artdıqca, mövqeyimiz daha da güclənəcək. İslam dünyası çox böyük qüvvədir və biz bu imkandan səmərəli istifadə etməliyik. Son illərdə dünyada baş verən proseslərdə birgə çağırışlarımız bu proseslərə təsir edir. İKT gücləndikcə onun siyasi təsir imkanları daha da genişlənəcək".

Ölkə başçısı iqtisadi inkişaf tempinə görə Azərbaycanın dünyada lider olduğunu bildirib. Azərbaycanda turizmin inkişafi üçün geniş imkanların olduğunu deyən İ.Əliyev özəl sektorun nümayəndələrini və İslam ölkələrini bu sahəyə investisiya qoymağa çağırıb. O, hökumətin ölkənin turizm sahəsinin inkişafina böyük diqqət göstərdiyini deyib və əlavə edib ki, bu gün ölkənin müxtəlif bölgələrində 3 yeni beynəlxalq aeroport, eləcə də müxtəlif bölgələrdə müasir otellər tikilir, turizm infrastrukturunun möhkəmlənməsi üçün böyük vəsaitlər qoyulacaq: "Azərbaycanın 9 iqlim zonası, 800 kilometrdən çox sahil zonası olan çox gözəl təbii şəraiti var. Bu isə onu göstərir ki, Azərbaycanda turizmin inkişafı üçün hər cür şərait var". İ.Əliyev İKT-yə üzv ölkələrin çox böyük potensiala malik ölkə olduğunu və bu ölkələr arasında daha böyük əməkdaşlığa ehtiyac olduğunu deyib.

Siyasi məsələlərə toxunan prezident İlham Əliyev 11 sentyabr terror hadisələrini xatırladaraq Azərbaycanın da uzun illərdən bəri terrordan əziyyət çəkdiyini bildirib: "Bölgə və Azərbaycan üçün ən böyük təhlükə mənbəyi olan Ermənistan-Azərbaycan-Dağlıq Qarabağ münaqişəsi uzun illərdir öz həllini tapmayıb. Ermənistanın Azərbaycana qarşı təcavüzü, etnik təmizləmə siyasəti nəticəsində bir milyondan artıq azərbaycanlı öz torpağından didərgin düşüb, 2000 nəfər isə terrorun qurbanı olub. Azərbaycan ərazilərinin işğal olunması ilə bağlı Birləşmiş Millətlər Təşkilatı, Avropa Şurası və İslam Konfransı Təşkilatı qətnamə və qərarlar qəbul etsə də, Ermənistan bu sənədlərə məhəl qoymur, münaqişə həllini tapmır". Bəzi qüvvələrin İslamı terrorla eyniləşdirmək cəhdlərini pisləyən dövlət başçısı bunu İslama təcavüz kimi qiymətləndirib. "İslam tolerantlıq, sülh dinidir. Biz bütün dinlərin nümayəndələri ilə əmin-amanlıq şəraitində yaşamaq istəyirik. İslam dünyada terrorizmə qarşı mübarizə aparan dindir. Bütün ölkələrin terrorizmə qarşı səyləri birləşməlidir. Təkbaşına bu bəla ilə mübarizə aparmaq mümkün deyil. Azərbaycan bu işdə, hər zaman olduğu kimi, yenə də öz töhfəsini verməyə hazırdır".

İKT-nin baş katibi Ekmələddin İhsanoğlu isə Azərbaycanın bu təşkilatın fəaliyyətini gücləndirməyə yönəlmiş siyasətini müsbət qiymətləndirib. O, İKT ölkələri arasında iqtisadi, ticarət və turizm əlaqələrinin gücləndirilməsinin vacib olduğunu deyib. Dünyada turizm sahəsində inkişafın hiss edildiyini deyən İKT-nin baş katibi keçən il dünya ölkələrinin turizmdən 35 milyard dollar əldə etdiyini bildirib: "Ötən il dünya ölkələri bir-birindən 18 milyon turist qəbul edib. İslam ölkələri arasında ən çox turist qəbul edən ölkələr Türkiyə və Malayziya olub. Azərbaycanın da geniş turizm potensialına malik ölkə olduğunu söyləyən E.İhsanoğlu deyib ki, ölkəmizin təbii resurslarının, unikal tarixi abidələrinin, qeyri-adi flora və faunasının olması turizmin inkişafına imkan verir. "Turizm ölkənin həqiqi imici və bəşəriyyət qarşısında duran məqsədlərə nail olmaq üçün çox vacib və səmərəli vasitədir", - Ekmaleddin İhsanoğlu əlavə edib.

Ümumdünya Turizm Təşkilatının (ÜTT) baş katibi Françesko Frangialli isə deyib ki, ötən il dünyada 800 milyon turist olub ki, bunun da 109 milyonu İslam ölkələrinin payına düşüb. O qeyd edib ki, bir sıra mənfi təzahürlər, o cümlədən dünyada baş verən terror hadisələri, "quş qripi" təhlükəsi və neftin qiymətinin bahalaşması da turizmin inkişafını əngəlləyə bilməyib, nəticədə ötən il turizmin inkişafında 5,5 faiz artım baş verib. ÜTT-in rəhbərinin fikrincə, bir sıra İslam ölkələri dünyanın turizm xəritəsində yeni parlayan ulduza çevrilə bilər.

Frangiallinin sözlərinə görə, Məhəmməd peyğəmbərin (ə.s.) karikaturaları ilə bağlı yaranmış vəziyyət İslama olan qərəzli münasibətin və bu dinə münasibətdə Qərb və İslam dünyası arasında anlaşılmazlığın mövcud olduğunu göstərdi. "İslamı terror dini kimi qələmə vermək olmaz. İslam - məhəbbət və sülh dinidir", - F.Frangiallinin fikrini tamamlayıb.

Xatırladaq ki, konfransda 38 islam ölkəsi təmsil olunub. Azərbaycanın Mədəniyyət və Turizm naziri Əbülfəs Qarayev konfransın açılış mərasimində çıxış edərək bildirib ki, toplantı islam ölkələri arasında turizm mübadiləsi və dostluq əlaqələrinin inkişafına xidmət edəcək. Onun sözlərinə görə, tədbirdə vacib məsələlər müzakirə olunacaq: "Biz bir sıra layihələr, o cümlədən islam ölkələrində turizm marketinqinə dair layihə ətrafında müzakirə aparacağıq".

Tədbirdə turizm baxımından zəngin proqram hazırlanıb. İştirakçılar Azərbaycanın görməli yerlərinə səyahət edəcək və turizm şirkətlərinin nümayəndələri ilə görüşəcəklər. Bundan başqa, Azərbaycan mətbəxi ilə geniş tanışlıq nəzərdə tutulub: Konfrans işini sentyabrın 12-də başa vuracaq.

525-ci qəzet. -2006.- 12 sentyabr.- S. 1; 3.