Abdulla A.
Bakıda yeni
incəsənət mərkəzi açıldı
“Ziya Art-Salon” sizə zövq
verəcək
Dünən İnşaatçılar prospekti-44
ünvanında yeni incəsənət mərkəzinin
açılışı oldu. «Ziya Art-Salon» adlanan mərkəzdə
bir-birindən gözəl, zərif, göz oxşayan,
könül açan əsərlər nümayiş
etdirilirdi. İstedadlı rəssamların, həvəskar
şəxslərin əl işləri, suvenirlər buraya
gələnləri bir anlığa həyatın bütün
qayğılarından uzaqlaşdırırdı.
Kəndirə sarınmış saxsı qablar, müxtəlif
ölçülü saxsı qapaqların birgə
kompozisiyası doğrudan da bu məkanın paytaxtda yeganə
yer olduğunu elə ilk andaca bildirir.
Rəssam Mir Teymurun keramika
əsərləri, Şəhla Dünyamalıyevanın, Orxan
Mirəliyevin kompozisiyaları, Tahir Quliyevin nərd taxtası,
Saleh Məmmədovun saxsı qabları, Tamella Qurbanovanın
ilin dörd fəslini əks etdirən kuklaları, Sitarə
Rəhimovanın muncuqlu tikmələri, Seyfəddin
Mənsumoğlunun, Samir Adiloğlunun taxta üzərində
dini yazıları, Nazilə Əbilovanın “Ağ
çiçək” xalçaları, “Pirəbədil”
mütəkkələri, Mehriban Zeynalovanın ipək saplarla
işlədiyi “Novruz xonçası” və digər əl
işləri tamaşaçıların zövqünü
oxşayırdı. Salonun açılışını
milli geyimli azyaşlılar etdilər. Onlar ənənəvi
olaraq lent kəsmədilər, düyünlənmiş
kəndirin düyününü açdılar.
Azərbaycanın müxtəlif bölgələrinin milli geyimlərində
olan qızlar isə xanım görkəmləri ilə
ətrafdakılarda milli geyimimizə maraq oyadırdılar.
Geyimlərin müəllifi Sabira Dünyamalıyeva bu
işlərə bir neçə il vaxt sərf etdiyini
söylədi.
Onu da nəzərinizə
çatdıraq ki, bu salonda siz istədiyiniz əl
işlərini sifariş verə də bilərsiniz.