Nəzakət

... Dünyasını vaxtsız dəyişmiş mərhum sənətkarın sənətindən ştrixlər

Mən ədalətli olmağa çalışırdım...

... Mən bəşəriyyəti sevmək və ona xidmət etməyə çalışırdım...

Yeni Qalereyada tanınmış rəssam və ictimai xadim, mərhum sənətkar Müslüm Eldarovun 50 illiyinə həsr olunmuş sərginin açılış mərasimi keçirildi.

Tədbiri giriş sözü ilə Yeni Qalereyanın direktoru Rafael Gülməmmədli açaraq, həyatını yarımçıq qoymuş sənəkarın sənət yolundan söz açdı. Azərbaycan rəssamlıq məktəbində özünəməxsus dəsti-xətti olan Müslüm Eldarov sənəti ilə dünyanın müxtəlif ölkələrində xalqımıza məxsus olan sənət ənənələrini təbliğ etməyə çalışırdı. Vətənin həqiqi oğlu olduğu üçün Müslüm Eldarov özünün əsas borcunun müasir Azərbaycan mədəniyyətinin populyarlaşdırılmasında görürdü.

Azərbaycan mədəniyyətinin təbliğ edilməsi, hər beynəlxalq dövlətdə onun təşəbbüsü ilə təşkil edilmiş tədbirlərdə milli bayrağımızın qaldırılmasının vacibliyini dərk edən mərhum sənətkar iştirakçısı olduğu mərasimlərdə buna nail olmağa cəhd göstərirdi.

Bir çox tədbirlərin təşkilatçısına çevrilən Müslüm Eldarov fəaliyyəti ilə bütün düşündüklərini reallaşdırmağa çalışmışdı. İstedadı, zəngin ideyaları, bacarığı və məqsədəyönlü fəaliyyəti ilə genişmiqyaslı nəticələrin əldə olunmasına nail olmuşdur. O, Azərbaycanın Yaradıcı Gənclərin Assosiyasının rəhbəri (SSRİ ərazisində birinci qeyri-formal birləşdirmə), Bakı İncəsənət Mərkəzinin yaradıcısı, "Kaspian" və “Salanf”, “Great Sifk Roac”, "Kaspian Research" jurnallarının, İngiltərədə Azərbaycan Mədəni nümayəndəliyinin, Londonda "Humay" bədii qalereyasının, Beynəlxalq nəşriyyat evi "Anqlo-Kaspian Publishing LTD" və məlumat agentliyi "GSRWnews" müəssisələrinin yaradıcısı və Qazaxıstan, Özbəkistan, Azərbaycan Dövlət Kitabların naşiri, çoxsaylı xarici sərgilərin və konsertlərinin təşkilatçısı olmuşdur.

Müslüm Eldarov Azərbaycan mədəniyyətinin dünyanın müxtəlif ölkələrində təbliğatçısına çevrilmişdir. Onun təşəbbüsü və təşkilatçslığı ilə Bakıda birinci beynəlxalq fotomüsabiqəsi keçirilmişdir. Müslüm Eldarov qoyduğu bu ənənəvi fotomüsabiqəsi bu gün də paytaxtımızda təşkil olunur və həmin müsabiqə mərhum sənətkarın adını daşıyır. Xatirə sərgisində Müslüm Eldarovun atası respublikanın xalq rəssamı Rəssamlıq Akademiyasının rektoru Ömər Eldarov çıxış edərək, Azərbaycan rəssamlıq məktəbinə imzasını atmış oğlunun vətənpərvərlik duyğularından söz açıb, onun yaradıcılıq fantaziyasına geniş yer verdi.

Qısa bir ömür yaşayan sənətkarın Azərbaycan mədəniyyətinin inkişafı naminə gördüyü işlərin, məhz vətənpərvərlik hissllərindən irəli gəldiyini iştirakçıların nəzərinə çatdırdı. Müslüm Eldarov dünyasını vaxtsız dəyişmiş olsa da, onun yaratdığı əsərlər, gördüyü işlər sənətkarın işığını hər zaman bizimlə bərabər yaşadır. Onun zahiri cizgiləri daxili dünyasının iç üzünü açıq-aydın göstərir və ziyalılıq mövqeyini təsdiqləyir. Tədbir istirakçıları Müslüm Eldarovun portretinin, məhz onu tanıyanlar tərəfindən həmişə beləcə qalacağını bildirdilər.

50 illik yubileyə həsr olunmuş xatirə sərgisindən Müslüm Eldarovun sənət dünyasının illərindən yadigar qalmış əsərlər tədbir iştirakçılarının ixtiyarına verildi. Bu əsərlərin hər birində Müslüm Eldarovun qapalı qalmış fikirlərindən olan ştrixlər fırçanın dili ilə sənətsevərlərə çox şeylərdən söz açırdı.

Səs.- 2006.- 20 sentyabr.- S. 12.