Turanə

Gəncə rəssamlarının sərgisi keçirilir

Dünən Səttar Bəhlulzadə adına Mərkəzi Sərgi Salonunda Gəncə rəssamlarının "Gəncə boyaları" adlı sərgisi keçirildi. Sərgidə Mədəniyyət və Turizm naziri Əbülfəs Qarayev çıxış edərək söylədi ki, bu gün respublikamızın mədəniyyət sahəsində əlamətdar günlərdən biridir. Bu tədbir həm də onunla əlamətdardır ki, bu salonda keçirilən sərgi digər böyük bir tarixlə də üst-üstə düşür. Bu da təsadüf deyil. Elə bu səbəbdən də sərginin bu gün keçirilməsini qərara almışıq. "Xatırladım ki, 3 gündür ki, Gəncə şəhərində təntənəli tədbirlər keçirilir. Azərbaycanın ən qədim şəhəri olan, bəlkə də dünyanın ən qədim şəhərləri sırasında seçilən Gəncənin 2500 illik tarixi qeyd olundu. Sözsüz ki, bizim incəsənət xadimləri o tədbirdə fəallıqla iştirak ediblər. Deyim ki, Gəncə rəssamlıq məktəbinin özünəməxsus ənənələri mövcuddur. Artıq beynəlxalq səviyyədə təmsil olunan sərgilərdə məhz onların da əsərlərini görmək olar. Çox şadam ki, son zamanlar Gəncədə aparılan işlərin müqabilində rəssamlara yetirilən diqqət kifayət qədər gözə çarpır. Bunların sırasına bu yaxınlarda Gəncədə şəhərin mərkəzində yeni bir qalereyanın açılmasını daxil etmək olar. Elə hesab edirəm ki, bu gün sərgilənən rəsmlər hesabına Gəncənin hazırkı incəsənət mənzərəsi haqqında dolğun məlumat veriləcək. Biz bu ənənəni davam etdirmək niyyətindəyik. Belə ki, ilboyu bu və ya digər salonlarda respublikanın digər bölgələrinin də rəssamlarının əsərlərini görəcəyik. Düşünürəm ki, bu cür mübadilə həm regionların zənginliyi, həm də məktəblərin bir-birirıə qoşulması və ümumi Azərbaycan rəssamlıq məktəbinin inkişafına daha da təkan verəcək".

Daha sonra Rəssamlar İttifaqının sədri Fərhad Xəlilov çıxış edərək bu günün önəmindən danışdı. "Naxçıvan, Şəki rəssamları özləri bəzən iştirak etməsələr də, son zamanlar onların əsərləri Bakıda tez-tez sərgilənir. Artıq bir neçə ildir ki, biz Gəncə rəssamlarının əsərlərinin Bakıda seyrçisi ola bilmirdik. Onu deyə bilərəm ki, burada sərgilənən əsərlər istedadlı rəssamlarımızın olduqca gözəl və mükəmməl işləridir". Tədbirin sonunda Ə.Qarayev və F.Xəlilov açılış rəmzi olan qırmızı lenti kəsdilər və tədbir iştirakçıları Rüstəm Cəmaləddinin "Qız portreti", Əhmədzadə Natiqin "Muğam", Vahab Cəfərovun "Fantaziya", Fərhad Əliyevin "Qədim Gəncə", Elşən Abdullayevin "Çaykənd", Faiq Osmanovun "Karvan" əsərlərinin seyrçisi oldular. Qeyd edək ki, sərgidə 21 müəllifin 130 əsəri nümayiş etdirilirdi.

Yeni Azərbaycan.- 2006.- 26 sentyabr.- S. 8.