Cavadov S.

Hacıqabulda yeni toxuculuq müəssisəsi işə düşüb

Regionların sosial-iqtisadi inkişafına dair Dövlət Proqramı hər yerdə olduğu kimi, Hacıqabulda da sürətlə həyata keçirilir. Son 3 il ərzində rayonda uzun müddət istifadəsiz qalmış bir neçə müəssisənin fəaliyyəti bərpa edilmiş, yeniləri tikilərək istifadəyə verilmişdir. Görulən tədbirlər nəticəsində 2 min 300-dən çox yeni iş yeri açılmışdır.
Toxuculuq sahəsi üzrə Hacıqabul qədim ənənəyə malikdir. Qədim zamanlardan buradakı qız-gəlinlər ilmələrlə gözəl və nəfis xalçalar toxumuşlar. Bu xalçalar evlərə yaraşıq gətirmiş, gəlin köçən qızlara ən qiymətli əşya kimi cehiz verilmişdir. Sonralar zamanın gərdişi ilə əsən "dağıdıcı küləklər" bu gərəkli sənət növünün inkişafını da alt-üst etdi. Hacıqabuldakı xalça sexi fəaliyyətini dayandırdı. Burada çalışan təcrübəli işçilər ya evdə oturdular, ya da çörək pulu dalınca başqa sahələrə üz tutdular.
Ölkə başçısı cənab İlham Əliyevin regionların sosial-iqtisadi inkişafına dair imzaladığı sərəncamlardan sonra bu rayonda da canlanma, inkişaf yarandı. Belə ki, 50 saylı yol-istismar sahəsi, 2 saylı yaşıllaşdırma idarəsi, rayonlararası Kür Tingçilik Müəssisəsi, "Pir Hüseyn" xanəgahında Dövlət Qoruğu, Nəvahi kəndində "Saf" şirkətinin meyvə və tərəvəz emalı üzrə filialı, "Hacıqabul Quşçuluq" SC-də gün ərzində 250 ton yem istehsal edən sex istifadəyə verildi, "Hacıqabul Balıq" SC-nin, Bürvənd nasos stansiyasının, "Muğan-1" firmasının fəaliyyəti isə bərpa edildi.
Bu günlərdə rayonda daha bir müəssisə - "YUNYON-S" MMC fəaliyyətə başlayıb. MMC-nin sədri Səlim Yusifov bildirdi ki, keçmişdə xalçaçılıq yönümündə fəaliyyət göstərən müəssisəni iki il bundan əvvəl özəlləşdirib. İlk növbədə buradakı iki əsas binanın - əyirici və toxucu sexlərinin uçmuş dam örtüyünü təmir etdirib, orada dəzgahlar quraşdırılıb.
Əvvəl əyirici sexinə baş çəkdik. 25 nəfərin çalışdığı bu sex indi tam gücü ilə işləyir. Bir neçə mərhələ keçdikdən sonra mahlıcdan alınmış saplar xüsusi qablara yığılaraq çəkisi məyyənləşdirildikdən sonra toxucu sexinə verilir. Sex rəisi Rasim Məmmədov toxuculuq işini yaxşı bilən mütəxəssisdir. O, Bakıda yaşamasına baxmayaraq, gəlib burada işlədiyini, müəssisəyə gələn gənclərə toxuculuq peşəsini həvəslə öyrətdiyini dedi. Müəssisənin ən böyük istehsal sahəsi isə toxuculuq sexidir. S.Yusifovun dediklərindən məlum oldu ki, bu sexdə olan toxuculuq dəzgahları əvvəllər başqa fabrikdə işlədildiyi üçün çox köhnəlib. 86 dəzgahdan yalnız 25-i yararlıdır. Maddi imkan yarandıqca həmin dəzgahlar yeniləri ilə əvəz olunacaq.
Cari ilin avqust ayının əvvəlində işə başlayan toxuculuq sexində hazırda 50 nəfər işləyir. Tam gücü ilə fəaliyyət göstərəndə burada 150 nəfər işləyəcək. Müəssisənin xammal təchizatı ilə bağlı heç bir problemi yoxdur. Respublikamızda, o cümlədən qonşu Əli Bayramlıdakı pambıq emalı zavodunda kifayət qədər mahlıc var. Özü də indi mahlıc satmaq müşkül bir məsələyə çevrilib. Təkcə Əli Bayramlı zavodunun həyətində min tonlarla mahlıc öz alıcısını gözləyir. Bu baxımdan, toxuculuq sənayesini inkişaf etdirmək müvafiq təşkilatları düşündürməlidir.
Yuxarıda qeyd etdiyimiz xalçaçılıqla da əlaqədar işlər qaydaya salınır. Artıq xalçaçılıq sexi bərpa olunub və burada 15 nəfər qadın işləyir. Yaxın gələcəkdə sahənin daha da genişləndirilməsi üçün Hacıqabul Rayon İcra Hakimiyyəti tərəfindən tədbirlər görülür.
Azərbaycan.-2006.-28 sentyabr.-S.3