"Azərbaycan 2006 - turizm aləmi" adlı fotomüsabiqənin qalibləri məlum olub

Səttar Bəhlulzadə adına Mərkəzi Sərgi Salonunda Mədəniyyət və Turizm Nazirliyi tərəfindən təşkil olunan "Azərbaycan 2006 - turizm aləmi" adlı fotomüsabiqənin yekunlarına həsr olunmuş tədbirdə Mədəniyyət və Turizm naziri Əbülfəs Qarayev çıxış edərək bildirib ki, müsabiqəni keçirməkdə məqsəd çox vacib olan bu iqtisadiyyat sahəsinin inkişafına dəstək vermək, ölkənin mədəni-tarixi irsini, təbiətinin gözəlliyini təbliğ etməkdən ibarət olub: "Azərbaycanın foto sənəti böyük potensiala malikdir. Digər məsələ odur ki, Azərbaycan həqiqətən də turizm məkanıdır. Bu gün sərgidə nümayiş etdirilən bütün əsərlər reklam broşurlarnda, jurnallarda çap olunacaq. Açığını deyim ki, həmişə Azərbaycan haqqnda kitab hazırlanarkən foto məsələsində çətinlik çəkirdik. Amma buradakı bütün əsərlər hər bir kəsdə Azərbaycan haqqında gözəl təsəvvür yarada bilər".

Sonra müsabiqənin qaliblərinin adları açıqlanıb. "Azərbaycan təbiəti", "İrs", "İstirahət və əyləncə", "Azərbaycanım mənim" kateqoriyaları üzrə keçirilən müsabiqədə hər kateqoriya üzrə 3 yerin qaliblərinə və digər fotolara görə həvəsləndirici mükafatlar sahiblərinə təqdim olunub. Qeyd edək ki, aprelin 12-dən sentyabrın 1-dək "Cənnət görmək istəyən Azərbaycana gəlsin" devizi altında keçirilən müsabiqədə Bakı şəhəri ilə yanaşı, Gədəbəy, Lənkəran, Masallı, Lerik, Qax, Zaqatala, Balakən, Qusar, Tovuz rayonlarından 77 peşəkar və həvəskar müəllifin 700-dən artıq fotoları iştirak edib.

Azad Azərbaycan.- 2006.- 3 sentyabr.- S. 7.