Çiçək

 

“Gənc rejissorların təcrübə toplamaq imkanları yoxdur”

Aktyor Rasim Balayev kinomuzdakı dəyişikliklərin gənc nəslin yetişməsində maneçilik törətdiyini söyləyir

 

Aktyor Rasim Balayev bu qənaətdədir ki, tamaşaçıların ötən əsrdə lentə alınmış filmlərə bu gün marağı var. Müsahibim bunu onunla əlaqələndirir ki, həmin fılmlərdə insan taleləri, hadisələrə baxış fərqlidir: "Rejissor ya ssenarist tamaşaçılara fikirlərini çatdıra biliblər. Ən zəif fılmlərimizdə belə maraqlı bir fikir, ibrət, tərbiyə vardı. Çox təəssüf ki, həmin ənənələr bu gün pozulub.

R.Balayev bunun obyektiv subyektiv səbəbləri olduğunu söyləyir. Onun dediyinə görə, məlum səbəblərdən ölkəmizdə uzun müddət kino çəkilişi olmayıb: "Bu səbəblər kino işçilərimizi kinodan uzaqlaşdırdı. Kino rejissorluğu elə peşədir ki, onu kitabdan öyrənmək olmur. Təcrübə əsas şərtlərdən biridir. Əvvəllər rejissorlanmızın əksəriyyəti öncə rejissor köməkçisi işindən başlayır, sonra ikinci rejissor olurdu. Daha sonralar püxtələşərək film çəkməyə başlayırdı. Belə olmasaydı, heç kimə film çəkmək həvalə edilməzdi.

İndi bu ənənələr pozulub. Hazırda 3-5 kinorejissorumuz var. Azərbaycanda çox az film çəkilir. Bütün bunlar isə cavan nəslin yetişməsi maneçilik törədir. İş olmasa, rejissor haradan təcrübə toplasın? Rejissorluq fakültəsini bitirən cavanlar kino olmadığından telekanallara üz tutur, başla klip çəkməyə qatırlar. Neyləsinlər?!" Aktyor deyir ki, gənclər klip çəkilişlərindən pul qazansalar da, öz peşələrində təkmilləşə bilmirlər.

Böyük kinonun böyük dərdləri olduğunu deyən R.Balayevin fıkrincə, zaman keçdikcə sənətkarlar da yetişəcək. Onun sözlərinə görə, dövrün dəyişməsi ilə əlaqədar Azərbaycan kinosuna çox az vəsait qoyulur. Buna baxmayaraq, aktyor inanır ki, yenidən kino ənənələrini davam etdirənlər olacaq: "Son zamanlar Qarabağ mövzusunda filmlərin çəkildiyini müşahidə edirəm. Bu, bizim yaralı yerimizdir. Mövzuya neçə illərdən sonra da qayıdılacaq".

 

Ayna.- 2006.- 2 sentyabr.- S. 21.