Mükərrəmoğlu M.

Bu gün “Şərq-Qərb” kinofestivalı başa çatır

Sentyabrın 8-də Zuqulbadakı Otel Hilside mehmanxanasında “Şərq-Qərb” kinofestivalı öz işini davam etdirdi. Burada “MDB və Baltikyanı ölkələrin kinoistehsalının hüquqi və təşkilatı problemləri” mövzusunda keçirilən “dəyirmi masa” iştirakçıları bu ölkələrin kinematoqrafının vəziyyətini, birgə çəkilişlərin layihələrini müzakirə etdilər. Qeyd olundu ki, bu ölkələrin kinosu vaxtilə vahid mərkəzdən idarə olunurdu, indi isə onlar müstəqil dövlətdirlər və öz yeni kinolarını yaradırlar.
Sonra “Kinorejissor Rasim Ocaqovun filmlərinin retrospektivi” silsiləsindən “Təhminə” filminə baxış keçirildi.
“Yeni sənədli Azərbaycan kinosu”na baxış da davam etdirildi. Rejissorlardan Tatyana Əliyevanın “Neft”, Yusif Quliyevin “Keçid” və Əlisa Nicatın “Yaxşı insan haqqında” sənədli filmlərinə baxış oldu. “Azərbaycanın yeni sənədli kinosu” mövzusunda keçirilən “dəyirmi masa”da da kinomuzun bu sahəsinin ciddi problemləri müzakirə edildi.
Dünən axşam isə “Azərbaycan” kinoteatrında festival filmlərindən ikisi nümayiş etdirildi. Macar kino ustalarının “Qohumlar” filminə tamaşaçılar böyük həvəslə baxdılar.
... Əsrlər boyu sınaqdan çıxmış qədim macar ənənələrindən biri belədir: lehinə yox, əleyhinə səs vermək... məhz beləcə. Filmin qəhrəmanı İştivan Kopyas Saratnok şəhərinin prokuroru seçilir və vəzifədə satqın Makrots ona mane olur. Kopyasın vicdanı təmizdir. O, kasıbdır, lakin qəlbi dünyanın xilası ilə bağlı ümidlərlə doludur. Buna baxmayaraq, baş prokuror səlahiyyətlərinə ədalətlə qulluq etməklə yanaşı, həm də şəhərin “Svinoferma” adlı nəhəng cinayətkar dəstəsinə qarşı müqavimət göstərmək, qohumlarının çoxsaylı iddialarına qarşı dayanmaqla, özünü çətin vəziyyətə salır. Kopyas hakimiyyətə can atır və nəticədə həyatı fəlakətlə nəticələnir.
Filmin rejissoru məşhur macar kino xadimi İştivan Sabodur. Onu da qeyd edək ki, festivalda macar kino tənqidçisi İvan Forqaç da iştirak edir.
Rusiya kino ustalarının “Mənə əzab deyil” filmi də tamaşaçılarda böyük maraq doğurdu. Aleksandr Balabanovun çəkdiyi bu kinolent müasir mövzudadır.
... Üç dost böyük şəhərin mərkəzindəki yaraşıqlı evin kandarında dayanmışlar. Onlar gəncdirlər, güclü və qüvvətlidirlər, hər birində istedad və həyat eşqi var... Bu gənclərin puldan başqa hər şeyləri var. Pul qazanmaq üçün evin sahibinə dizayner xidmətləri təklif edirlər. Evin sahibəsi Natella Antonovna da gəncdir, lakin, görünür, həyat onu bezdirmişdir. Hər halda Mişa ilə görüşə qədər belə idi. Mişa Natellaya yenidən həyatı sevməyi öyrədir. Natella isə ona və dostlarına maraqlı iş tapır. Ancaq Natella Mişadan nəyi isə gizlədir ki, bu da hər iki gəncin sonrakı taleyinə güclü təsir göstərir.
Filmdə baş rolları Renata Litvinova, Aleksandr Yatsenko, Dmitri Düjev ifa edirlər.
Festivalın bağlanışı bu gün “Azərbaycan” kinoteatrında olacaq. İştirakçılar Türkiyə kino ustalarının “İqlimlər” filminə baxacaqlar.

Xalq qəzeti.-2006.-9 sentyabr.- S. 6.