Mükərrəmoğlu M.

“Şərq-Qərb” kinofestivalı öz repertuarını təqdim edir

Festivalın gündəliyi

Bakıda keçirilən VIII Beynəlxalq “Şərq-Qərb” kinofestivalı dünən “Azərbaycan” kinoteatrında öz işini davam etdirmişdir. Həmin gün repertuarda olan üç yeni film tamaşaçılara göstərilmişdir. Onlardan ikisi Rusiya kinematoqrafçıları tərəfindən təqdim edilmişdir.
“Alatoran” filminin rejissoru Artyom Antonov gəncdir və bu kinolent onun sayca 4-cü filmidir. O, Birinci Yeni Monreal Kinofestivalında ən yaxşı debüt işinə görə mükafat almışdır. 2006-cı ildə isə Rumıniyada keçirilən beynəlxalq kinofestivalda “Ən yaxşı rejissor” nominasiyasının qalibi olmuşdur.
Filmin prodüsseri İqor Kalyonov da festival nümayəndələri arasında idi. O bildirdi ki, bu film müharibənin dəhşətləri haqqındadır.
... 1944-1945-ci illərin qışı. Müharibə sona doğru yaxınlaşır. Səssiz-səmirsiz Tayqada itib-batmış şimal kəndində alman hərbi əsirlərindən ibarət briqada radiomayak üçün qüllə tikir. Kənd sakinləri — cəbhədə doğma və yaxınlarını itirmiş qadınlar və qocalar əsirləri qarşılayırlar...
Rusiya kino ustalarının tamaşaçılara təqdim etdiyi ikinci film isə “Nankin mənzərəsi” adlanır. Bakıda qonaq olan filmin rejissoru Valeri Rubinçik öz filmi haqqında bunları dedi: “Aleksandr adlı bir nəfər sadəlövh Nadyaya görə cinayətkarlarla rəqabətə girir və qalib gəlir. İki mühüm nağıl əsasında qurulmuş bu film yəqin ki, tamaşaçıların ürəyincə olacaq”.
Dünən “Azərbaycan” kinoteatrında nümayiş etdirilən üçüncü film isə Tacikistan kino ustalarının lentə aldıqları “Gözləmə təqvimi” kinolentidir. Bu filmin rejissoru Səfərbəy Soliyev də festival iştirakçıları arasında idi. Onun sözlərinə görə bu festivalın filmləri Şərqlə Qərbin ahəngini yaradır. Deyir ki, belə festivallar xalqları bir-birinə yaxınlaşdırır, yaradıcı adam üçün yeni imkanlar açır.
Rejissorun təqdim etdiyi bu filmin qəhrəmanının babası Sibirə sürgün edilmişdir. Atası müharibə ərəfəsində, Almaniyada həlak olmuşdur. Hər ikisinin dəfn olunduqları yer məlum deyil. İndi o istəyir ki, heç olmasa özü bu torpaqda dəfn edilsin.
Filmin hadisələri əhalisi çətinliklər və gözəlliklərin fövqündə dayanan bir dağ kəndinin gün doğandan gecəyədək olan yaşantılarını əks etdirir. Və həmin gün ağrılı qış günü sona yetir, bahar gəlir. Festivalın proqramına salınmış bu film yeganə tacik filmidir.
Kinorejissor Rasim Ocaqovun filmlərinin retrospektivi və yeni Azərbaycan sənədli filmlərinə baxış da davam etmişdir.

Xalq qəzeti.-2006.-9 sentyabr.- S. 5.