Rəhimqızi Z.

Kino kompleksi yaradılacaq

Bu barədə "Şərq-Qərb" kinofestivalında çıxış edən Əbülfəs Qarayev məlumat verib

Heydər Əliyev adına sarayda VIII "Şərq-Qərb" Beynəlxalq Bakı Kinofestivalının açılış mərasimi oldu. Köhnə Bakının maketi fonunda təşkil edilən tədbirdə öncə Azərbaycan kinosunun yaranma tarixi xatırlandı. 1898-ci ildə lentə alınan "Qatarın gəlişi", "Bibiheybətdə yanğın" və "Balaxanıda neft fontanı" kinoxronikası nümayiş olundu. Mərasimdə xaricdən gələn qonaqlar üçün Azərbaycan kinosunun səhifələri vərəqləndi və qeyd edildi ki, sözügedən sənədli kino lentlərindən düz 18 il sonra "Neft və milyonlar" səltənəti filmi çəkilib. Bakı kino fabrikində istehsal olunan ilk filmlərdən biri də görkəmli aktyor və rejissor, represiya qurbanı Abbas Mirzə Şərifzadənin 1925-ci ildə çəkdiyi "Bismillah" filmi və Cəfər Cabbarlının 1928-ci ildə ssenari müəllifi kimi debüt işi olan "Sevil" filmi çəkilib. 1945-ci ildə Muxtar Dadaşovla Rza Təhmasibin çəkdiyi "Arşın mal alan" bədii filmi isə Sovet kinosunu dünya miqyasında tanıdan bir film olub.
Festivalda Azərbaycan kinosunun mövcud vəziyyətinə də toxunularaq kinematoqrafçıların ildə cəmi iki film çəkdikləri qeyd edildi. VIII "Şərq-Qərb" Beynəlxalq Bakı Kinofestivalının rəsmi hissəsini mədəniyyət və turizm naziri Əbülfəs Qarayev açdı. Nazir festivalın keçirilməsini təqdirəlayiq saydığını bildirdi. Nazir eyni zamanda bu ildən etibarən "Nizami" kinoteatrının təmir ediləcəyini və burada kino kompleksi yaradılacağını dedi. O, çıxışında milli kinomuzun vəziyyətinə və Azərbaycan kinematoqrafçılarının qarşılaşdıqları çətinliklərə toxundu: "Bizim kino işçilərimiz artıq belə çətinliklərə alışıb. Amma zaman keçdikcə problemləri geridə qoyuruq. Artıq yeni avadanlıqlar alınır, yararsız binalar təmir edilir".
Nazir çıxışının sonunda Azərbaycan kinosunun gələcəyinə nikbin baxdığını və gələcəkdə çəkilən filmlərin sayının artırılacağını bildirdi.
"Şərq-Qərb" festivalının prezidenti Rüstəm İbrahimbəyov isə çıxışında fetivala qatılan filmlərin adlarını, müəlliflərini, eləcə də bu filmlərdə rol alan aktyorları iştirakçılara təqdim etdi. Mərasimin sonunda isə Oleq Səfərəliyevin "Əlvida, cənub şəhəri" filmi təqdim edildi. Qeyd edək ki, filmin ssenari müəllifi Rüstəm İbrahimbəyov, quruluşçu operatoru Murad Əliyev, bəstəkarı Siyavuş Kərimidir. Baş rollarda Timur Bədəlbəyli, Fəxrəddin Manafov, Mehriban Zəki, Fuad Poladov, Elmira Şabanova, Tofiq Mirzəyev və Hacı İsmayılov çəkiliblər.
Xatırladaq ki, "Şərq-Qərb" kinofestivalı sentyabrın 9-na kimi davm edəcək.

Ayna.- 2006.- 6 sentyabr.- S. 8.