"Şərq-Qərb" Kinofestivalı açıldı

Festivala 13 ölkədən 60-dan çox kino xadimi qatılıb

Dünən Heydər Əüyev adına Sarayda VIII "Şərq-Qərb" Bakı Beynəlxalq Kinofestivalının açılış mərasimi keçirilib. Mərasimdə öncə qonaqlara Azərbaycan kinosunun yaranma tarixi və bu illər ərzində çəkilən filmlər haqqında məlumat verilib. Eyni zamanda, filmlərdən fraqmentlər də nümayiş etdirilib və Azərbaycan kinosunun tanınmış rejissorlarından, yaddaqalan obrazlar yaradan aktyorlardan söz açılıb.

Tədbirdə Mədəniyyət və Turizm naziri Əbülfəs Qarayev çıxış edib: "Artıq 8-ci ildir ki, Bakıda beynəlxalq "Şərq-Qərb" Kinofestivalı keçirilir. Bu, Azərbaycan kinosu üçün çox böyük uğurdur. Bu il respublikamıza 13 ölkənin 60-dan çox kino xadimi təşrif buyurub. Hər birinizi burada görməkdən şərəf duyuruq".

Nazir dövlət başçısı İlham Əliyevin də təbriklərini çatdırıb. Qeyd edib ki, bu ildən başlayaraq ilbəil Azərbaycan kinosuna daha çox vəsait ayrılacaq.

Festivalın prezidenti və Azərbaycan Kinomatoqrafçılar İttifaqının sədri Rüstəm İbra-himbəyov da qonaqları salamlayıb və festival haqqında məlumat verib. O bildirib ki, bu il festival sentyabrın 8-nə kimi davam edəcək. Bu müddət ərzində kinoteatrlarda müxtəlif ölkələrin istehsalı olan filmlər nümayiş olunacaq. Festival çərçivəsində kinorejissor Rasim Ocaqovun filmlərinin retrospektivi də təşkil ediləcək. Dörd gün davam edəcək festival çərçivəsində Zağulbada dəyirmi masalarda keçiləcək (APA).

Festivalın açılış mərasimində Elçin Əzizov, əməkdar artist Gülyanaq Məmmədova və başqalarının çıxışları olub.

Ekspress.- 2006.- 5 sentyabr.- S. 16.