Aytən

Üzeyir Hacıbəyovun adı Musiqi Akademiyasına qaytarılacaqmı?

Tələbələr bu məsələdə akademiyanın rəhbərliyinə arxalanırlar

Bakı Musiqi Akademiyasında (BMA) yaranan qalmaqal, deyəsən, hələ çox davam edəcək. Akademiyanın rektoru, tanınmış bəstəkar Fərhad Bədəlbəylinin bir müddət öncə mətbuata verdiyi açıqlamalar, daha sonra isə tələbələrin sözügedən təhsil ocağının qarşısında keçirdikləri etiraz aksiyaları bundan xəbər verir.

Əslində əgər biz Azərbaycanda yox, başqa bir ölkədə yaşasaydıq, Musiqi Akademiyasının tələbələrinin belə bir addım atmalarına təəccüblənməzdik. Əgər gənclər Üzeyir Hacıbəyovun adının akademiyaya qaytarılmasını tələb edirlərsə və bununla bağlı orijinal formada etiraz aksiyası keçirirlərsə (xatırladaq ki, tələbələr ilk aksiya zamanı BMA-nın qarşısında Ü.Hacıbəyovun əsərlərini ifa ediblər, sonrakı mərhələdə BMA-nın binasının damından tələbləriylə bağlı şuarların yazıldığı plakatları asıblar. Təxminən 4 saat davam edən aksiya polis tərəfindən dağıdılıb) bunu normal qarşılamaq lazımdır. İntəhası, bizə qaranlıq qalan məqam başqadır. Aksiya baş tutan gün Fərhad Bədəlbəyli ölkədə olmayıb. Nəyə görə, tələbələr rektorun Vyanadan qayıtmasını gözləməyiblər? Bəlkə, F.Bədəlbəyli onların bu hərəkətini dəstəkləyəcəkdi?

Qeyd edək ki, Fərhad Bədəlbəyli Üzeyir Hacıbəyovun dahi bəstəkar olduğunu xatırladaraq, onun adının Musiqi Akademiyasına qaytarmasının vacibliyini vurğulamışdı. Bununla bağlı dəfələrlə lazımi qurumlara müraciət etdiklərini və müsbət cavab almadıqlarını təəssüflə qeyd etmişdi. Bir neçə gün öncə isə BMA-nın rəhbərliyi ali təhsil ocağına Üzeyir Hacıbəyovun adının qaytarılması ilə bağlı növbəti dəfə Prezident Aparatına müraciət edib.

Dünən məsələnin nə yerdə olduğunu öyrənmək üçün Musiqi Akademiyasına yollandıq. Bir neçə tələbə ilə söhbətimiz zamanı bəlli oldu ki, onlar fikirlərində israrlıdırlar və Üzeyir Hacıbəyovun adı musiqi ocağına bərpa olunan günə kimi etiraz aksiyalarını davam etdirəcəklər. Tələbələrlə söhbətdən aydın oldu ki, onlar aksiyaları özbaşına təşkil etmirlər, akademiyanın rəhbərliyinə arxalanırlar. Onu da öyrəndik ki, musiqi ocağının tələbələri növbəti piketə hazırlaşırlar.

BMA-nın Tələbə Gənclər Təşkilatının sədri Mənzər Mirəliyeva bizimlə söhbətində rəhbərlik tərəfindən 3 dəfə hökumətə müraciət göndərdiklərini qeyd etdi: "İnanırıq ki, Üzeyir bəyin adı gec-tez akademiyaya qaytarılacaq. Məsələ yaxın günlərdə öz həllini tapacaq".

Xalq cəbhəsi.-2006.- 27 sentyabr.- S. 15.