Türk dünyasının
birliyinin möhkəmlənməsi və onun beynəlxalq aləmdə
güclü siyasi mövqeyə malik olması üçün
bütün imkanlar var
Xəbər verdiyimiz kimi,
sentyabrın 18-də Türkiyədə, Antalya Kültür
Mərkəzində II Beynəlxalq Avrasiya
kinofestivalının təntənəli
açılış mərasimi olmuşdur.
Azərbaycan Prezidenti İlham Əliyev mərasimdə
iştirak etmişdir.
Mərasimə toplaşanlar dövlətimizin
başçısını və xanımını
hərarətlə qarşıladılar.
Kinofestivalı Türkiyənin tanınmış kinoaktyoru
Korkan Abay açaraq bu kinofestivalın 43-cü Avrasiya
Qızıl Portağal kinofestivalının tərkib
hissəsi kimi iki il bundan əvvəl təşkil edildiyini
bildirdi. Sentyabrın 23-dək davam edəcək festivalda
100-dən artıq ölkənin filmləri nümayiş
etdiriləcəkdir. Festival iştirakçıları
arasında tanınmış kinoşünaslar, aktyorlar,
mədəniyyət və incəsənət xadimləri
vardır. Azərbaycanı bu festivalda kinorejissor Şamil
Nəcəfzadə, aktyorlar Sənubər İsgəndərli
və Çimnaz Atakişiyeva təmsil edirlər.
Sonra Antalya Böyük Şəhər
Bələdiyyəsinin başçısı Menderes Türel
çıxış edərək Azərbaycan Prezidenti
İlham Əliyevi, Türkiyənin Baş naziri Rəcəb
Tayyib Ərdoğanı, Antalyada keçirilən Türkdilli
dövlətlərin və topluluqların 10-cu dostluq,
qardaşlıq və əməkdaşlıq
qurultayının digər iştirakçılarını,
sənət adamlarını salamladı. O, belə
tədbirlərin mədəniyyət, incəsənət
sahəsində əlaqələrin daha da
genişlənməsi baxımından səmərəli
olduğunu söylədi.
Sonra Azərbaycan Prezidenti İlham Əliyevə xatirə
olaraq festivalın xüsusi hədiyyəsi təqdim olundu.
Dövlətimizin başçısı hədiyyəyə
görə təşəkkür etdi.
Daha sonra Şimali Kiprin Prezidenti Mehmet Əli Tələtə,
habelə Orta Asiya dövlətlərinin prezidentlərinə
təqdim edilmək üçün həmin
ölkələrdən gəlmiş nümayəndə
heyətlərinin başçılarına, eləcə
də sənət adamlarına, festivalın təşkilində
əməyi olanlara xatirə hədiyyələri təqdim
olundu.
Baş nazir Rəcəb Tayyib Ərdoğan və digər
çıxış edənlər festivalın
əhəmiyyətindən, kino sənətinin
inkişafından, ölkələrarası
münasibətlərdə mədəniyyətin rolundan
danışdılar və festivalın işinə uğurlar
arzuladılar.
Sonra incəsənət ustalarının
çıxışı oldu. Azərbaycanın xalq artisti
Zeynəb Xanlarovanın ifası tamaşaçılar
tərəfindən hərarətli alqışlarla
qarşılandı.
Daha sonra Azərbaycan Prezidenti İlham Əliyev,
Türkiyənin Baş naziri Rəcəb Tayyib Ərdoğan,
nümayəndə heyətlərinin üzvləri, Antalya
Dövlət Opera və Balet Teatrı orkestrinin ifasında
"İpək yolu" əsərini dinlədilər.