İbrahimova S.
"Azyaşlıların
musiqiyə olan tələbatı ödənilmir"
Oqtay Zülfüqarovun fikrincə, gənc kadrlar bu işdə maraqlı deyillər
Uşaq mahnılarının
yazılmaması Xalq artisti, bəstəkar Oqtay
Zülfüqarovu narahat edir. Konservatoriyanın
bəstəkarlıq fakültəsinə tələbatın
bir o qədər də zəif olmadığını
deyən bəstəkar təəssüflə bildirir ki, onlar
arasında uşaq mahnıları yazanlar yetişmir. Onun
fikrincə, dövrün tələbatı ilə ayaqlaşan
gənc kadrlar azyaşlıların musiqiyə olan
tələbatını ödəmirlər: "Bu gün
elə bir bəstəkar tanımıram ki, sırf uşaqlar
üçün işləsin. Bu, heç də yaxşı
göstərici deyil. Əvvəllər uşaqlar
üçün bir sıra mahnı müsabiqələri
təşkil olunardı. Onlar sənətə
həvəsləndirilərdi. İndi uşaqlar
səviyyəli müsabiqələrə həsrət
qalıblar".
Uşaq Dövlət Filarmoniyasının
"Aysel" Uşaq Mahnı Teatrının bədii
rəhbəri olan O.Zülfüqarov hesab edir ki,
uşaqların istəməyərək türk və ara
musiqilərinə aludə olması onların
maariflənməsinə güclü təsir göstərir. "Bu gün üç evdən
birində ya şair, ya bəstəkar, ya da ki,
müğənni yetişməkdədir. Bunların nə
məktəbi, nə yolu var. "Həvəskarlar" ordusuna
qoşulub ayda ən azı 10 mahnı
bəstələyirlər. Belə mahnılar həmin evdə
böyüyən uşağın zövqü və
tərbiyəsində müəyyən dərəcədə
rol oynayır. Çox təəssüf ki, mövcud prosesin
qarşısını almaq qeyri-mümkündür. Problem ancaq illərlə
həll olunacaq məsələdir. Məncə, zaman-zaman sənətdə
peşəkar olmayanlar
və bu sənətə pul mənbəyi kimi baxanlar ələnib göyə sovrulacaqlar".
O.Zülfüqarov qeyd edir ki,
mədəniyyətimizin vəziyyətinin
qeyri-qənaətbəxş olmasında öncə özəl kanallar günahkardır: "Mən
hansı özəl kanala deyə bilərəm ki, bu mahnını efirə verməsin. Hər kanal öz bildiyini
edir, insanların zövqlərini korlayır,
azyaşlı uşaqların
beyninə zövqsüz
mahnılar salır.
Hər kanal özü üçün müsabiqə
keçirir. Müsabiqənin səviyyəsindən danışmağa
belə dəyməz".
Peşəkar bəstəkar olmaq üçün diplomun vacibliyini qeyd edən bəstəkar ali məktəblərdəki boşluqların da onu narahat etdiyini deyir. Onun fikrincə, 8 milyonluq əhalisi olan ölkədə ildə 1-2 bəstəkarın yetişməsi az göstəricidir: "Dolanışığa görə bir çox məzunlar sənətini biznesə dəyişib, yaxud xaricə üz tutublar. Onların yazdığı səviyyəli musiqilər qiymətləndirilmir. Amma əcnəbi ölkələrdə həmin əsərlər dərsliyə salınıb gənclərə aşılanır. Orada çalışan gənc həmkarlarımızın sənətinə yüksək qiymət verilir".
Bəstəkarın fikrincə, hər bir bəstəkar yazdığını duymağı bacarmalı və Azərbaycan musiqisinin incəliklərinə bələd olmalıdır: "İndiki bəstəkarları bəstəkar edən səsli-küylü texnikalardır. Başa düşmürlər ki, professional bəstəkar olmaq üçün savada yiyələnmək lazımdır. İndikilər hətta Azərbaycan intonasiyasının nə olduğunu bilmirlər. Düzdür, Ələkbər Tağıyevin də diplomu olmayıb. Ancaq o, fərdi yaradıcılıqla deyil, kollektiv yaradılıcılıqla məşğul olub və Azərbaycan musiqisinin incəliklərini bilib".
Ömrünü uşaq mahnılarının yaranmasına vəonların inkişafına həsr edən O.Zülfüqarov onu bu yaşda royalın qarşısından ayırmağın mümkünsüz olduğunu deyir. Arabir səhhəti pisləşsə də, barmaqlarının təsirindən səslənən royalın dillərindəki musiqilər onu ruhən cavanlaşdırır və sağlam edir. Uşaq Mahnı Teatrının yetirmələrini ətrafında görəndə isə əhvalı tamam başqa olur. Deyir ki, musiqidəki özbaşınalıq aradan götürülsə, hələ uzun illər yaşayacaq və yaradacaq: "Hazırda uşaqlar üçün mahnılar bəstələyirəm. Bundan başqa, fleyta və simfonik orkestr üçün əsər yazıram. Yeni əsərim nəvəm ƏminəZülfüqarova və Üzeyir Hacıbəyov adına Azərbaycan Dövlət Simfonik Orkestrinin ifasında bu yaxınlarda səsləndiriləcək".