Xatun
Bunu Ağadadaş
Ağayev söyləyir
"Bu gün
Azərbaycan şou-biznesinin vəziyyəti məni qane etmir.
Biz sənətə öz səsimizlə gəlmişik.
Kimdənsə kömək ummamışıq". Bu qənaətdə
olan xalq artisti Ağadadaş Ağayev hesab edir ki,
sənəti olmayan insanların yardımçı
qüvvələrin vasitəsi ilə meydana atılması
Azərbaycan mədəniyyətinin faciəsi deməkdir.
"Bu faciənin qarşısını almaq xalqın
üzərinə düşür. Hər səhnəyə
çıxanı xalq alqışlamamalıdır. Bu gün
səhnədən daha çox süni alqış səsləri
eşidilir. Bunun bir yolu var - o da xalqın belə
dırnaqarası sənətçiləri boykot etməsidir.
Əgər xalqın etiraz səsi eşidilərsə,
həmin müğənnilər səhnəni tərk
etmək məcburiyyətində qalacaqlar", - deyərək
müğənni öz etirazını bu cür bildirdi.
Daha sonra yaradıcılığından söz salan
A.Ağayev musiqili layihələr ərsəyə
gətirdiyini bildirdi. Amma bir müddət maddi
sıxıntılar yaşayan müğənni bunların
həllinin nə vaxt baş tutacağını deyə
bilmədi. Onun yarımçıq qalan yaradıcılıq
işləri sırasında solo-layihəsi də durur. Buna
baxmayaraq o, sponsor müraciətlərini qəbul etmədiyini
bildirdi. Dedi ki, yalnız sanballı şirkətlərlə
müqavilə imzalamağa razılıq verər:
"Sponsorların niyyəti qoyduğu pulu artıqlaması
ilə çıxarmaqdır. Amma mənim niyyətim
kimlərəsə pul qazandırmaq deyil, xalqıma sanballı
konsert təqdim etməkdir".
Ayna.- 2006.- 8
sentyabr.- S. 8.