İbrahimova S.

"Şou-biznes anlamı düzgün formalaşmayıb"

Yalçın Rzazadə hamının müğənni olmaq istəyini normal qarşılamır

"Təəssüflər olsun ki, Azərbaycanda şou-biznes anlamı düzgün formalaşmayıb. Çünki hər yerindən duran müğənni olmaq həvəsinə düşür. Bunun nəticəsidir ki, səhnəyə əcnəbi musiqilərdən təsirlənmiş, istedadsız, ifrat dərəcədə soyunmağa meyilli olan gənclər gəlir". Bu sözləri dilə gətirən Xalq artisti Yalçın Rzazadənin qənaətincə, müasir şou-biznesdə həddindən artıq bərbad vəziyyət hökm sürür.

Sənətçi qeyd edir ki, xüsusilə də səhnəyə gələn gənc qızlar səsi ilə deyil, bədən quruluşlarını nümayiş etdirməklə məşhurluq qazanmaq istəyirlər. "Amma tamaşaçını aldatmaq olmaz. Əsl musiqisevər dinləyiciyə nə qədər bayağı mahnı təqdim etsən də, o, yaxşını pisdən ayırır. Odur ki, belələrinə bir dəfə qulaq asdıqdan sonra üzünü çevirir" - deyə o əlavə etdi.

Öz növbəsində Yalçın Rzazadə şou-biznesdə təmsil olunan yaşlı müğənnilərin yüngül hərəkətlərini də qəbul etmir. O hesab edir ki, səhnə təcrübəsi olan müğənnilər həm mədəniyyətlərini nümayiş etdirməli, həm də səviyyələrini qorumalıdır.

Söhbət əsnasında Yalçın Rzazadə yerli telekanallarda yayımlanan maqazin proqramlarına da münasibət açıqlayıb. "Ümumiyyətlə, yerli telekanalların yüngül şoulara, maqazin verilişlərinə daha çox yer ayırması məni narahat edir. Düşünürəm ki, bu kimi verilişlər gənc nəslin düzgün tərbiyə olunmasında maneçilik törədir" - deyə o bildirib. Müxtəlif səpkili verilişlərə dəvət edildiyini deyən Yalçın Rzazadə yerli televiziya məkanında səviyyəli kanal və verilişlərin sayının azlığına təəssüf edir. Sənətçi qeyd edir ki, özünə və sənətinə son dərəcə hörmətlə yanaşdığından dəvət aldığı verilişlər arasında seçim edir: "Mən hər hansı bir verilişə dəvət ediləndə mütləq seçim edirəm. Üstəlik, verilişin qonaqlarının kimlər olduğu ilə də maraqlanıram. Əgər digər dəvətlilərin sənəti mənim səviyyəmdə deyilsə, təbii ki, mən o verilişdə iştirak etmirəm".

Bəlli oldu ki, Yalçın Rzazadə son zamanlar bir sıra gənc ifaçının onun repertuarına müraciət etməsini müsbət qiymətləndirir. O hesab edir ki, gənc olmasına baxmayaraq, sənətin dəyərini bilən bu müğənnilər düzgün yoldadır: "Ölkədə keçirilən musiqi müsabiqələrindəki gənclərin əksəriyyəti mənim mahnılarımı oxuyur. Hətta həmin mahnılara kliplər də çəkdirirlər. Hətta bu yaxınlarda təxmini bir hesablama apardım. 38 mahnıma klip çəkiblər. Əgər mən o mahnıları yaxşı ifa edib sevdirməsəydim, yəqin cavanlar bu mahnılara müraciət etməzdilər. Amma bəzən də görürsən ki, mahnını pis oxuyurlar. Bax, bu zaman çox məyus oluram".

Qeyd edək ki, Yalçın Rzazadə bir müddət öncə solo konsert proqramı ilə pərəstişkarlarının qarşısına çıxmağı planlaşdırırdı. Sənətçi qeyd edir ki, obyektiv səbəblər üzündən bu istəyini gerçəkləşdirə bilməyib: "Səhhətimdə bəzi problemlər yarandığından, solo konsert keçirmək arzusunu həyata keçirə bilmədim. Amma inanıram ki, tezliklə bu istəyimi gerçəkləşdirə biləcəyəm. Əslində, bu konsertin baş tutmasını çox istəyirəm. Çünki çoxdandır belə bir proqramla tamaşaçı qarşısına çıxmamışam. Hesab edirəm ki, bu, hesabat xarakterli konsert olacaq. Qoy, xalqım görsün ki, Yalçın dəyişməyib, səsini itirməyib, əksinə, daha mükəmməl formadadır. Düşünürəm ki, bu konsert payız aylarında gerçəkləşəcək".

Kaspi.-2006.-7 sentyabr.-S.12