Məlahət

"23 il gözlədiyim an yetisdi"

Flora Kərimova: "Solo-konsert istəyim yuxarı dairələrdə çox müsbət qarşılanıb"

Estradımızın uiduzu Flora Kərimova 23 illik fasilədən sonra nəhayət ki, böyük səhnəyə çıxacaq. Ünlü sənətçinin dekabr ayında solo-konsert verəcəyi haqda yayılan xəbərlər artıq təsdiqlənib. Dünən müğənni ilə əlaqə saxladıqda bildirdi ki, solo-konsertlə çıxış etmək təşəbbüsü yuxarı dairələr və Mədəniyyət Nazirliyi tərəfindən çox müsbət qarşılanıb.

Bununla da Flora xanımın nigarançılığına son qoyulub. "Mən bu məsələdə Mədəniyyət Nazirliyindən dəstək gördüm. Mənə verilən məlumata görə, solo-konsert təşkil etmək istəyimə yuxarı dairələrdə münasibət çox müsbətdir. Hesab edirəm ki, bu məsələdə mənim sənətimə hörmət oldu. Baxışlarım haqda söhbət belə getmədi. Öndə sənət və sənətkar oldu. Bu sənət yolunda mənə yaşıl işıq yandıran hər kəsə sənətkar "sağ ol"u deyirəm. 23 il gözlədiyim an nəhayət ki, yetişdi. Mən heç vaxt qismət ardınca qaçmadım. Qismət mənim ardımca gəldi. Allahıma çox şükürlər edirəm ki, daha bir qadağa sırasını ləyaqətlə keçə bildim. Tanrıma minnətdaram. Bilirsiniz, bəndə Tanrının üzünü ağardanda, Tanrı da bəndəsinə halallıq qazandırır. Mən Onun varlığını hər zaman hiss etmişəm. Tanrı yaratdığı insanların əliylə mənə kömək edib" -söyləyən sənətçi solo-konsertinin vaxtını yaxın günlərdə dəqiqləşdirəcəyini bildirdi.

Sənətçi qeyd etdi ki, 18 oktyabr-Azərbaycanın Müstəqilliyi haqqında Konstitusiya Aktının qəbul olunduğu gün solo-konsert keçirmək istərdi, lakin vaxt baxımından bu mümkün deyil. 23 il böyük bir müddətdir. 23 ildən sonra solo-konsertlə çıxış etmək böyük məsuliyyət və gərgin iş tələb edir. Ona görə də çox calışmalıdır. Bunun üçünsə zaman lazımdır. Bu səbəbdən solo-konserti dekabr ayında keçirməyi planlaşdırır. Müğənni konsertin hazırlıqlarına artıq başlayıb. Konsertin çox möhtəşəm olacağı gözlənilir. Flora xanım solo-konsertində həm retro, həm son dövrlər yazılan mahnılarını və ümumilikdə bütün dövrləri əhatə edən, solmayan mahnılarıni ifa etməyi düşünür. Solo-konsertdə rəqs kollektivlərinin iştirakı nəzərdə tutulur.

Şərq.- 2006.- 7 sentyabr.- S. 9.