Mətin R.

“Estradamızda peşəkarlıq qıtlığı var”

Tünzalə Ağayeva: «Bakı payızı» müsabiqəsi həyatımda özəl bir səhifə tutur»
Xanım sənətçimiz dünyanın hansı məşhurları ilə duet oxumaq istərdi?
Illər öncə başı çalmalı bir qız “Sevdi can səni...” mahnısıyla tamaşaçıların qarşısına çıxdı. Bu mahnı tez bir zamanda sevildi və onun məşhurlaşmasına səbəb oldu. Sonra bir-birinin ardınca zövq oxşayan mahnılar tamaşaçıların ixtiyarına verildi. O vaxtdan illər keçib. Artıq müğənni Tünzalə Ağayeva sevilən-seçilən sənətçilər içində özünəməxsus yer tuta bilib. Sənətçi ilə

görüşüb, yaradıcılığındakı yeniliklərlə maraqlandıq.
Məlum oldu ki, ikinci albomunu bu yaxınlarda hazırlayan müğənni artıq üçüncü albom üzərində işləyir. O, həmçinin sırf xalq mahnılarından ibarət ayrıca albom hazırlamaq barədə də düşünür. Müğənni həm də yeni mahnılar üzərində çalışır: “Bu günlərdə səfərdən qayıtmışam, ”Rəngli planet" adlı yeddinci dünya festivalında iştirak etmişəm. Ölkəmiz müstəqillik əldə edəndən Çexiyada ilk dəfədir ki, Azərbaycan müsiqisi səsləndi. Ilk addımı mən atdım, buna görə qürur hissi keçirirəm. Gələcək üçün planlar çoxdur, inşallah, reallaşdıqca biləcəksiz". Sənətçi xanım

həm də konsert təşkil etmək fikrindədir, amma bu il yox. Onun sözlərinə görə, gələn il pərəstişkarları üçün tam fərqli - canlı və müxtəlif janrları əhatə edən müsiqilərlə zəngin bir

konsert verəcək. Nə isə, müğənni ilə söhbətimizi sizlərə təqdim edirik.
- Sənətdə kimlərdən öyrənmisiniz, kim sizin üçün sənətkarlıq nümunəsi olub?
- Paytaxtda doğulmasam da, musiqi informasiyam hər zaman dolğun olub. Üzeyir bəydən başlayaraq, Rauf Hacıyev, Tofiq Quliyev, Vaqif Gərayzadə, Rafiq Babayev, Cəmil Əmirov kimi sənətkarlar mənim üçün örnək olub. Bu, böyük bir məktəbdir. Sözün yaxşı mənasında, onların

mənə hər zaman təsiri olub və olaraq qalır.
- Bəs sənətə gəlməyinizə kim kömək etdi?
- Səhnəyə çıxmağımın səbəbkarı “Bakı payızı” müsabiqəsi oldu. 1988-ci ildən müsabiqə keçirilmirdi, 2001-ci ildə bərpa olundu və mən orada iştirak etdim. Bu müsabiqə mənim üçün böyük əhəmiyyət kəsb edir, həyatımda özəl bir səhifə tutur.
- Sizcə, bugünkü estradamızın hansı problemləri var?
- Müasir estradamızın böyük, bəlkə də qlobal dərəcədə problemləri var. Ən əsası, peşəkarlıq qıtlığı var, hər şey özfəaliyyət səviyyəsindədir. Dünyada savadı olmayan istedadlı gənci şou-proqramlar vasitəsilə, yaxud prodüserlərin köməyilə məşhurlaşdırmaq istəyirlər. Onu savadlı şəkildə yönləndirirlər, onlarla peşəkarlar işləyir. Bizdə isə azacıq səs, oxumaq bacarığı olan kimi, bunu əllərində bayraq edib, yerli-yersiz hərəkətlərə başlayırlar. Insanların fikrində qatma-qarışıqlıq yaradırlar. Bu, narahatedici məqamdır, insanların zövqü korlanır. Bir də, yeni sənətə başlayanlar özlərini peşəkarlarla bir səviyyədə tuturlar, bu da böyük problemdir. Başqa tərəfdən, istedadsızlar, xüsusən gənclərin zövqünü korlayırlar. Gənclər, uşaqlar belə ifaçıları görüb, yaxşı kimi qəbul edirlər. Fikirləşirlər ki, onlar televiziyalara çıxırlarsa, deməli, ən yaxşılarıdır. Bu gün peşəkarlıqla özfəaliyyət çox qarışdırılıb. Bunun qarşısını almaq lazımdır. Çünki baş verənlər

mədəniyətimizin səviyyəsinə çox pis təsir edir.
- Gənc ifaçılardan kimi bəyənirsiniz?
- “Şeron” qrupunda Rüstəmin, “A trio”da oxuyan Zaurun ifasını bəyənirəm. Bu qrupların kompozisiyasını dinləmişəm, xoşuma gəlib. “Azəristar”da oxuyan Kamran Ismayılovun da

ifasını bəyənirəm.

- Tünzalə Ağayeva kiminlə duet oxumaq istəyər?
- Dünya musiqisindən söhbət gedərsə, bir çox sənətçilərin adlarını çəkə bilərəm: Andreo Baçelinin vurğunuyam, onunla, Stinqlə, Tina Törnerlə, Şade ilə, ümumiyyətlə, adını çəkmədiyim bir çox dünya ulduzları var ki, onlarla duet oxumaq istəyirəm.

- Öz müğənnilərimizi bəyənmirsiniz?
- Niyə elə deyirsinz? Bayaq adını çəkdiyim insanlarla, Rüstəmlə, Zaurla duet oxumaq istəyərəm.

Ilqar Muradovla duet oxusam, mənim üçün dünyalara dəyər.
- Bəzi müğənnilər bəstəkar qıtlığından şikayətlənirlər. Doğrudanmı, ölkədə bəstəkar qıtlığı var?
- Söhbət peşəkar bəstəkarlardan gedirsə, bəli. Savadlı musiqi yazan, ağıllı, məntiqli mahnılar

bəstələyən bəstəkarlara böyük ehtiyac var. Bir boşluq var və bu, hiss olunur.
- Bəzən müğənnilər seçki və ya müxtəlif başqa kampaniyalarda iştirak edir, kimlərisə dəstəkləyirlər. Bu isə onu sevənlər, pərəstişkarlar tərəfindən yaxşı qarşılanmır. Sənətçilər niyə

qoşulur belə kampaniyalara?
- Düşünürəm ki, hər bir müğənninin kimisə dəstəkləmək haqqı var. Bunda qəbahət görmürəm. Əgər müğənni kimisə qəlbən dəstəkləyirsə, niyə də reallıqda olmasın? Fikrimcə, sənətçi xalqını

dəstəkləməlidir.
- Sənət adamlarının şəxsi həyatı da maraqa izlənir. Yenidən ailə qurmaq istərdinizmi?
- Mən bu cür sullardan qaçıram. Istəmirəm şəxsi həyatım müzakirə obyektinə çevrilsin. Qoy şəxsi həyat elə şəxsi həyat kimi qalsın. Istəyirəm məni sənətçi kimi tanısınlar, sevsinlər.
- Sənətin ailəyə, yaxud ailənin sənətə qurban verilməsiylə bağlı tez-tez fikirlər səslənir. Ailənin

sənətə qurban verilməsi nə dərəcədə qəbul olunandır?
- Bilirsiniz, kimisə etdiyi hərəkətə görə qınamaq düzgün deyil. Biz kimik ki, kimisə qınayaq? Hər kəs öz əməllərinə görə Allah qarşısında cavabdehdir. Kimisə ailəsini sənətinə qurban verdiyinə görə qınamaq düz deyil. Yəqin ki, onu hansısa problemlər buna məcbur edib. Amma mənə belə gəlir ki, ailənin sənətə qurban verilməsinə ehtiyac yoxdur. Ailə də, sənət də - hər ikisi insan üçün vacibdir. Hər bir qadın üçün ailə qurmaq, uşaq sahibi olmaq böyük xoşbəxtlikdir və

lazımdır.

Azadlıq.-2006.-30 sentyabr.-S. 16.