Haaqadakı Azərbaycan Kültür Dərnəyi fəaliyyətini genişləndirir

Xarici Ölkələrdə Yaşayan Azərbaycanlılarla İş üzrə Dövlət Komitəsindən bildirmişlər ki, Haaqa şəhərində fəaliyyət göstərən Azərbaycan Kültür Dərnəyi fəaliyyətini daha da genişləndirmiş, azərbaycanlıları birləşdirən mərkəzə çevrilmişdir. Təşkilatın idarə heyətinin yığıncağında görülən işlər müzakirə edilmiş və gələcək fəaliyyət istiqamətləri müəyyənləşdirilmişdir. Natiqlər bildirmişlər ki, Azərbaycan Kültür Dərnəyi Haaqada yaşayan çoxsaylı soydaşlarımız arasında milli-mənəvi dəyərlərimizin qorunub saxlanılması, Azərbaycanın qədim və zəngin mədəniyyətinin Niderland ictimaiyyətinə çatdırılması məqsədi ilə yaradılsa da, dəyişən zamanın yeni şərtləri daha geniş sahədə fəaliyyət göstərməyi zərurətə çevirmişdir.

Məlumat verilmişdir ki, dərnəyin ilk sədri Fərhad Ateş, habelə İbrahim Qarabağ, Agah Yoncalı, Cəlal Qaragöz kimi dəyərli insanların səyləri nəticəsində Azərbaycan Kültür Dərnəyi 1995-ci ilə qədər Tovuz, Qazax, Ağstafa və Bakıda xeyriyyə aksiyaları keçirmiş, Novruz bayramı, Dünya Azərbaycanlılarının Həmrəyliyi günü, Respublika günü kimi əlamətdar tarixlər münasibətilə Haaqada toplantılar və konfranslar təşkil etmişdir. Azərbaycanın Avropa ölkələrindəki səfirlikləri və nümayəndəlikləri ilə yaxın münasibətlər quran dərnək Azərbaycanda baş verən prosesləri yaxından izləyərək, bu barədə məlumatları Avropa mətbuatına çatdırır.

Müzakirələr zamanı Avropadakı bütün Azərbaycan mədəniyyət mərkəzləri və diaspor təşkilatları ilə əlaqələrin genişləndirilməsinin vacibliyi vurğulanmış, birgə tədbirlərin həyata keçirilməsi ilə bağlı layihələrin hazırlandığı bildirilmişdir.

Respublika.- 2006.- 10 sentyabr.- S. 2.