Bakı Bələdiyyə Teatrı 15 illik yubileyə hazırlıq görür

"Bakı Bələdiyyə Teatrının binası ilə bağlı çox yerə müraciət etmişəm. Ancaq məsələmiz hələ də həll olunmayıb. Yəqin hələ zamanı gəlib çatmayıb deyə, eyni vəziyyət davam edir". Bu sözləri APA-ya Bakı Bələdiyyə Teatrının direktoru, xalq artisti Amaliya Pənahova deyib. Teatrın yubiley ərəfəsində olduğunu bildirən A. Pənahova yanvar ayında bu sənət ocağının 15 illiyinin qeyd ediləcəyini söyləyib. Onun sözlərinə görə, yubileylə əlaqədar İnqilab Kərimovun müəllifliyi ilə kitab nəşr olunacaq: "Kitabda teatrın 15 illik fəaliyyəti əksini tapacaq.. Eyni zamanda qastrol səfərlərimiz də işıqlandırılacaq". Teatr yerli mövsümü Cəlil Məmmədquluzadənin "Ölülər" komediyası ilə açacaq. Bundan əlavə, teatrın repertuarına Amaliya Pənahovanın benefis tamaşası da daxil ediləcək. Benefisdə bu zamana kimi aktrisanın oynadığı tamaşalardan fraqmentlər toplanacaq. A. Pənahova bildirib ki, sənətşünas İlham Rəhimli onun haqqında "Səhnə ömrünün sirdaşı" adlı kitab hazırlayır. Yaxın vaxtlarda kitabın təqdimatı keçiriləcək.

Palitra.- 2006.- 6 sentyabr.-S. 13.