Həsənov Ə.

Taisiva Povaliv:

Bakıya səfər etmək mənim arzumdur

Ukraynanın xalq artisti qəzetimizə eksklüziv müsahibə verdi

- Taisiya xanım, bildiyimiz kimi, Nikolay Baskovla birgə «MuzTV 2006» 4-cü Milli Televiziya müsabiqəsinin «ilin ən yaxşı dueti» mükafatına layiq görülmüsünüz. Bu münasibətlə sizi təbrik edirik. Gələcəkdə Baskovla duetinizi davam etdirəcəksiniz?

- Təbrikə görə çox sağ olun. Sizin diqqətli və informasiyalı olmağınız məni sevindirir. Bilirsiz, Nikolay Baskovla birgə yaradıcılıq işimiz hər ikimizin xoşuna gəldiyi üçün onu gələcəkcə davam etdirmək fikrindəyik. Xüsusən də, əgər duetimizi dinləyicilər çox isti qarşılayıblarsa. Əminəm ki, Baskovla növbəti duetimiz də bizə yüksək mükafatlar qazandıracaq. Fikrimcə, «Sən uzaqdasan» («Tı daleko») mahnısı ən yüksək rnükafata layiqdi. Görürəm ki, bu mahnı tez-tez müxtəlif hit-paradlarda yüksək yerləri tutur, müxtəlif musiqili proqramların dinləyiciləri onu sifariş edirlər. Deməlli, Nikolay Baskovla birgə layihəmiz mütləq davamlı olmalıdır.

- Karyeranız bpyu əldə etdiyiniz ən qiymətli mükafat hansıdır?

- Bütün mükafatlarım, xüsusən də, ilk mükafatlarım mənim üçün çox qiymətlidir. Bu, o qədər təsirli anlar olub ki, hətta göz yaşlarımı saxlaya bilməmişəm. Sözsüz, illər keçdikcə, əldə etdiyimiz nailiyyətləri daha sakit, emosiyasız qəbul edirəm, amma bu o demək deyil ki, onları qiymətləndirmirəm. Artist üçün önəmlisi odur ki, onun yaradıcılığı tamaşaçıların xoşuna .gəlsin, qiymətləndirilsin.

- Sənətinizə verilən yüksək qiymət, çoxsaylı priz və mükafatlar yaradıcılığınızda böhran yaratmır ki?

- Əlbəttə, yox. istəyirəm, tamaşaçılar həmişə məni sevsinlər, onların məhəbbətini itirməkdən qorxuram. Buna görə də çox işləmək və eksperiment etmək lazımdır. Hər yeni dinləyicinin ürəyinə yol tapmağı bacarmalıyam. Çünki dünən aktual olan mövzu bu gün tamamilə marağını itirə bilər.

- Müsahibələrinizin birində demisiniz ki, əldə etdiyiniz mükafatlara görə Ukraynanın eks-prezidenti Leonid Kuçmaya çox minnətdarsınız. Bəs Ukraynanın indiki prezidenti Viktor Yuşşenkoya qarşı hansı hissləri keçirirsiniz?

- Leonid Daniloviç Kuçmanı şəxsən tanıyıram və bir şəxsiyyət kimi ona simpatiyam var. Siz hətta təsəvvürünüzə belə gətirə bilməzsiniz ki, onunla sadəcə söhbət etmək mənə necə böyük zövq verir! O, çox ünsiyyətcil və səmimi insandır. Ukraynanın indiki prezidenti Viktor Yuşenkoyla indiyə qədər heç görüşməmişəm də. Ona görə də onun necə insan olduğu barədə bir söz deyə bilmərəm. Prezidentliyinə gəlincə, qoy onun işinə siyasətçilər və politoloqlar qiymət versinlər.

- Bəs onda haqqınızda gəzən söz-söhbəti necə şərh edərdiniz? Deyilənə görə, siz sonuncu prezident seçkilərində Viktor Yuşşenkonun seçkiqabağı təbliğat kampaniyasında iştirak etməkdən ötrü 500.000 dollar pul almısınız.

- Nə qədər? Yarım milyon dollar? Yəni kimsə bu pulları sayıb? Əlbəttə ki, bu, zarafatdır... Düzünü desəm, seçkiqabağı kampaniya zamanı mənə heç vaxt heç kim pul verməyib. Sadəcə, təbliğat konsertlərində öz kollektivimlə birgə çıxış etdiyim üçün müəyyən qədər qonorar almışam. Həmin müsahibədə Viktor Yanukoviçlə bağlı söylədiyim fikirlər isə ürəyimdən gəlib. Bunu məndən heç kim xahiş etməyib.

- Növbəti sualım yenə pulla bağlıdır. Azərbaycanda müğənnilər disklərin satışından və solo konsertlərdən deyil, əsasən toylardan gəlir əldə edirlər. Bəs Ukraynada vəziyyət necədir?

- Bizdə də eyni vəziyyətdir. Əgər əvvəllər konsertlərdən pul qazanırdıqsa, indi bu, belə deyil. İndi insanlar konsertə xərclədikləri pulu daha vacib işlərə sərf etmək barədə düşünürlər. Şükür Allaha, hələlik, mən belə təhlükəylə üzləşməmişəm. Bu yaxınlarda Odessa və Simferopolda konsertlərim böyük anşlaqla keçib. Amma əvvəlki konsertlərdən indi yoxdur. Məsələn, 2001-ci ildə Kiyevin «Ukrayna» mədəniyyət sarayında ardıcıl olaraq 5 konsert verdim və onların hər biri anşlaqla keçdi. İndi isə artistlər toy, ad günləri və tədbirlərdən pul qazanmaq məcburiyyətindədirlər.

- Nə vaxtsa Bakıda olmusunuz?

- Təəssüf ki, yox. Amma çox istərdik ki, sizin gözəl ölkənizi ziyarət edək. Bilirsiz, bu il Bakıda səfərdə olan Nikolay Baskov şəhəriniz barədə o qədər yaxşı şeylər danışıb ki. Bakıya səfər etmək mənim arzumdur!

Gündəlik Azərbaycan.- 2006.- 6 sentyabr.- S. 14.