“Mən direktor olmaqla yanaşı, həm də aktyoram”

Artıq paytaxt teatrları təzə movsümü açıb. Maraqlıdır, görəsən, teatrlarımız nə kimi yeniliklər vəd edir? Suallarımıza cavab tapmaq məqsədilə üz tutduq Gənc Tamaşaçılar Teatrına. Teatrın direktoru Mübariz Həmidovla görüşüb, yeniliklərdən xəbərdar olduq.

- Mübariz müəllim, teatrınızda nə kimi yeniliklər var?

- Bu müddət ərzində biz teatrda bəzi kosmetik işlər aparmışıq. Nizam-intizamı qaydasına qoymuşuq. Bilirsiniz, nizam-intizam olmayan yerdə yüksək keyfiyyətli yaradıcılıq işindən söhbət gedə bilməz.

- Maraqlıdır, əsərləri səhnələşdirməmişdən öncə Bədii Şurada müzakirə edirsiniz?

- Əlbəttə, müzakirələrdə müxtəlif fikirlər səsləndirilir.

Bədii şuranın üzvləri hansı qərarı verirlərsə, onu da qəbul edirik. Hər halda, şurada ən azından 30-35 il teatr təcrübəsi olan mütəxəssislər təmsil olunurlar. İnanmıram ki, hər hansı bir zəif əsər pulun, sponsorun xatirinə Bədii Şuradan keçə bilsin.

- Yeri gəlmişkən, sabiq direktor Kamal Əzizov bu teatrda sponsorluqla tamaşaların səhnəyə qoyulduğunu təsdiq edirdi...

- Bilirsiniz, əslində, biz bunu inkar etmirik. Hər yerdə olduğu kimi bizim də müəyyən problemlərimiz var. Misal üçün, bu gün zala istilik verilmir. 1988-ci ildə bu teatr istismara buraxılandan sonra istilik sistemi müəyyən vaxt işləyib. Amma son illər əsaslı təmir olunmadığından bu gün teatrda istilik sistemi işləmir. Yaxın günlərdə nazirliyin təklifiylə respublikanın bir çox teatrları əsaslı təmirə dayandırılacaq.

- Nədənsə, teatrlarımızın reklam məsələsi də problemə çevrilib. Teatrların əksəriyyətinin reklam şitləri heç də tamaşaçıların nəzər-diqqətini çəkmir.

- Düz deyirsiniz, reklamdan çox şey asılıdır. Bu yöndə müxtəlif addımlar atmaq fıkirindəyik. Çalışıb, imkanımız daxilində teatrın önündə tamaşaların reklam lövhələrini asacağıq.

- Bu sual jumalist marağımdan irəli gəlir: nə üçün teatrınızın qarşısında adı yazılmır?

- Nəzərdə tutmuşuq ki, təmirdən sonra teatrın ön hissəsindəki oval yerə onun adını yazdıraq.

- Yeni mövsümdə qastrol səfərləriniz gözlənilirmi?

- Planlarımız çoxdur. Teatrımız əsaslı təmirə dayananda da, yəqin ki, truppamız fəaliyyətini davam etdirəcək. Bakı ətrafı qəsəbələrdə, kəndlərdə, məktəblərdə və teatr binası olan rayon mərkəzlərində tamaşa nümayiş etdirmək barədə fikirləşirik. Çünki teatrımızın repertuarı həddindən artıq zəngindir. Onu da deyim, teatrımız bir neçə dəfə xaricdə təşkil olunan festivallarda iştirak edib. Mənim rəhbərliyim altında teatrımızın kollektivi Rusiyanın Kazan şəhərində, türkdilli xalqların "Novruz" Beynəlxalq Teatr Festivalına qatılıb. Bilirsiniz, xarici ölkələrə getmək kifayət eləmir. Gərək, bunun üçün daha yaxşı tamaşalar səhnələşdirəsən.

Ən əsası da odur ki, getdiyimiz ölkənin teatr ictimaiyyəti arasında Azərbaycan teatrı haqqında normal təsəvvür yarada bilək. 2008-ci ildə Gənc Tamaşaçılar Teatrının 80 yaşı tamam olacaq. 1928-ci ildə bu teatrın rus bölməsi, bir il sonra isə Azərbaycan bölməsi fəaliyyətə başlayıb. Gənc Tamaşaçılar Teatrının heç şübhəsiz, peşəkar Azərbaycan teatrı tarixində özünəməxsus yeri var. Mən bu teatra ilk dəfə ayaq basanda Yusif Vəliyev, Osman Hacıbəyov, Məmmədağa Dadaşov, Susanna Məcidova, Hüseynağa Sadıqov, Süleyman Ələsgərov kimi sənətkarları görmüşəm, onlarla bir tamaşada səhnəyə çıxmışam. Bu gün Firəngiz Şərifova kimi bir sənətkar bizim teatrımızda çalışır.

- Mübariz müəllim, bundan sonra səhnəyə çıxacaqsınız? Hər halda, aktyor üçün ən rahat, ən istəkli yer səhnədir.

- Təbii ki, hər bir aktyorun ürəyində səhnə sevgisi olur. Hələliksə, bu barədə fikirləşmirəm, görüləsi işlər çoxdur. Bütün işləri yoluna qoyandan sonra həmin məsələyə qayıdarıq.

Amma mən direktor olmaqla yanaşı, həm də aktyoram. Buna görə hökumətimiz əməyimi qiymətləndirib, mənə fəxri ad da verib.

- Bu gün Gənc Tamaşaçılar Teatrının bir çox tanınmış aktyorları nədənsə son illərin tamaşalarında görünmürlər. Soruşanda da deyirlər ki, teatrda yaxşı tamaşalar hazırlanmır, rollar qanedici deyil. Əslində, aktyor üçün rolun böyük-kiçikliyi olmamalıdır. Amma hər halda, maraqlıdır, bu problem nə ilə bağlıdır?

- Bəli belələri var... Bütün məlumatlar mənim stolumun üstündədir. Bilirsiniz, bu, əvvəlki direktorun çalışdığı zamanlarda belə idi. Bu da əmək bölgüsünün düzgün aparılmamasından irəli gəlirdi. Kimsə hansısa rolu istəyib, onu başqasına verib, həmin aktyoru küsdürüblər...

- Bəs təzə mövsümü hansı tamaşa ilə açacaqsınız?

- Mövsümü sentyabrın 24-də açacağıq. Əvvəlcə teatrın binası qarşısında azyaşlılar üçün kloun və aktyorlarımızın bayram tamaşası nümayiş ediləcək. Bundan sonra tamaşaçılar binaya daxil olacaqlar. Daha sonra isə uşaqlara Alla Axundovanın əsəri əsasında Rafiq Əliyevin səhnələşdirdiyi "Sirr" tamaşasını təqdim edəcəyik. Biz tamaşaya kimsəsizlər evinin uşaqlarını da dəvət etməyi düşünürük. Axşam saatlarında isə böyüklər üçün Tamara Vəliyevanın əsəri əsasında Loğman Kərimovun səhnələşdirdiyi "Mənim ağ göyərçinim" tamaşası oynanılacaq. Tamaşadan əvvəl isə çıxışımız olacaq.

Xalq cəbhəsi. -2006.- 19 sentyabr.- S. 15.