Sevil

"Arşın mal alan" Vyanada tamaşaya qoyuldu

Operettaya Qərbi Avropada ilk dəfə baxıldı

Ötən gün "Ata-holdinq" ASC-nin sponsorluğu ilə Vyana Kammeroper Teatrında böyük bəstəkarımız Üzeyir Hacıbəyovun "Arşın mal alan" musiqili komediyasının premyerası olub. Beləliklə, musiqili "Arşın mal alan" ilk dəfə olaraq Qərbi Avropada, dünya musiqi mədəniyyətinin mərkəzi sayılan Vyanada tamaşaya qoyuldu.

Premyerada iştirak edən "Ataholdinq" ASC Müşahidə Şurasının sədri Əhməd Erentok Şərqdə ilk milli opera hesab edilən "Arşın mal alan" operettasının Vyana Kamera Operasında səhnələşdirilməsinə və bu layihəyə sponsorluq etdiyinə görə holdinq rəhbərliyinin və kollektivinin böyük qürur hissi keçirdiyini bildirib: "Vyanada bu layihənin gerçəkləşdirilməsi ilə "Arşm mal alan" operettası dünyanın 40 dilinə tərcümə edildi. Biz bundan sonra da Azərbaycan mədəniyyətinin dünyada tanıdılması naminə mühüm əhəmiyyət kəsb edən layihələrin gerçəkləşdirilməsi üçün köməyimizi əsirgəməyəcəyik".

Azərbaycan xalqının tarix boyunca həmişə mədəniyyət və incəsənətlə bağlı olduğunu deyən Ə.Erentok vurğulayıb ki, bu sahədə dünyada məşhur olan bir çox sənət adamları yetişdirilib.

Qeyd edək ki, operetta sentyabrın 28 və 30-da da Vyana Kamera Operasının səhnəsində göstəriləcək. Tamaşaya rəhbərlik Bakı Musiqi Akademiyasının rektoru Fərhad Bədəlbəyli, . Şövkət Məmmədova adına Opera Studiyasının direktoru və bədii rəhbəri Azad Əliyev

tərəfindən olunur. Tamaşanın quruluşçu rejissoru və dirijoru Maykl Snakdır. Operettada yalnız Avstriya müğənniləri iştirak edir. Ariyalar Azərbaycan dilində, rolların mətni isə almanca ifa olunur.

Komediyada Gülçöhrə obrazını Aisa Lindsey, Asyanı Joanna Luto, Tellini Kaoka Amano, Əsgəri Ramin Dustdar, Soltan bəyi Cin Jakus Roussi, Vəlini Volfqanq Seyla, Süleyman bəy obrazını isə Maykl Eberle oynayır.

Həftə içi.- 2006. – 28 sentyabr.- S. 8.