Birinci Beynəlxalq Rus kitabı festivalının iştirakçıları Bakıya gəlmişlər

 

Sentyabrın 14-də Heydər Əliyev adına Beynəlxalq Hava Limanı Birinci Rus kitabı festivalının iştirakçılarını — mədəniyyət və incəsənət xadimlərini, tənqidçiləri, bibliofilləri və yazıçıları, cəmi 130 adamı gətirən təyyarəni qəbul etmişdir.
Proqramın zənginliyinə baxmayaraq, festival Azərbaycan paytaxtında cəmi iki gün keçiriləcəkdir. Bu iki gündə Milli Parkda “Festival şəhərciyi” fəaliyyət göstərəcək və buraya gələnlər kitab nəşri sahəsində yeniliklərlə tanış ola biləcəklər. Yazıçıların iştirakı ilə “Dəyirmi masa” da keçiriləcəkdir. Qonaqlar Quba, Xaçmaz, Şamaxı rayonlarına gedəcəklər. Bakı filarmoniyasında poeziya gecəsi olacaqdır.
Nümayəndə heyəti ilə birlikdə Bakıya gələn dünya şöhrətli ədiblər Çingiz Aytmatov və Oljas Süleymenov əmin olduqlarını bildirmişlər ki, festival yüksək səviyyədə keçəcək və həm iştirakçıların, həm də bakılıların xatirəsindən silinməyəcəkdir.
Çingiz Aytmatov demişdir: “Neçə illərdir Bakıya gələ bilmirdim. Budur, indi fürsət düşdü və oğlumla birlikdə gəlmişəm. Keçmiş sovet, indi isə türkdilli mədəniyyətimizin başlıca ocaqlarından birini oğluma göstərmək istəyirəm. Bu baxımdan rus kitabı festivalı xüsusi əhəmiyyət daşıyır. Mən qəti əminəm ki, tarixin bizə bəxş etdiyi yaxşı nə varsa, onların hamısını qoruyub saxlamalıyıq”.
Yazıçı öz oxucularını yeni əsərləri ilə sevindirib-sevindirməyəcəyi barədə suala cavabında bildirmişdir ki, “Drujba narodov” jurnalının baş redaktoru onunla birlikdə Bakıya gəlib və onun “Dağlar dağılanda” adlı yeni romanının nəşr edildiyi jurnalın bir neçə nüsxəsini özü ilə gətiribdir. Lakin yazıçı ona yaxın adamların bu əsərlə artıq tanış olduqlarını eşitdikdə, çox böyük məmnunluq duyduğunu söyləmişdir. Xatırladaq ki, “Festival şəhərciyi” Milli Parkda sentyabrın 15-də fəaliyyətə başlayacaqdır.

 

Xalq qəzeti.- 2006.- 15 sentyabr.- S. 4.