Əsədov B.

Birinci Beynəlxalq Rus kitabı festivalı Bakıda keçirilir

Azərbaycanda Rusiya ili çərçivəsində bu gün Bakıda Rusiya Federasiyasının Prezidenti Vladimir Putinin və Azərbaycan Respublikasının Prezidenti
İlham Əliyevin təşəbbüsü və dəstəyi ilə Birinci Beynəlxalq Rus kitabı festivalı başlayır.
Festivalın təşkilatçıları Azərbaycan Mədəniyyət və Turizm Nazirliyi, Rusiya Kütləvi Kommunikasiyalar Federal Agentliyi, habelə Rusiya İnformasiya Teleqraf Agentliyi - İTAR-TASS-dır. Bu dostluq bayramında çağdaş rus kitabının yaradılmasında müstəsna xidmətlər göstərmiş 150 nəfərə qədər şair, nasir, publisist və dövlət xadimindən ibarət nüfuzlu nümayəndə heyəti iştirak edir. Onların arasında Çingiz Aytmatov, Oljas Süleymenov, Veronika Dolina, Tatyana Ustinova, Eduard Uspenski, Vera Pavlova, David Markis, Aleksandr Ebonidze və başqaları kimi dünyada tanınmış nüfuzlu qələm sahibləri var.
Maraqlı və zəngin tədbirlər proqramı olan festival ulu öndər Heydər Əliyevin memorialını və Şəhidlər xiyabanını ziyarətdən sonra Milli parkdakı Əl Oyunları sarayında açılacaq. Burada təşkil edilmiş kitab sərgi-yarmarkasında tamaşaçılara Rusiya nəşriyyatlarının minlərlə çap məhsulu təqdim olunacaq. Festival başa çatdıqdan sonra on beş mindən çox kitab təmənnasız Mədəniyyət və Turizm Nazirliyinin tabeliyindəki kitabxanalara paylanacaq.
Festival günlərində Azərbaycan Yazıçılar Birliyində "Şərq və Qərb şairləri, Puşkin və Nizami ənənələri" mövzusunda dəyirmi masa, Azərbaycan Dövlət Filarmoniyasında poeziya gecəsi keçiriləcək. Respublikamızın görkəmli incəsənət ustaları, qonaqlar şəhər sakinləri qarşısında möhtəşəm konsert proqramı ilə çıxış edəcəklər. Rusiyalı yazarlar və naşirlər Bakı Slavyan Universitetində, Xaçmaz, Şamaxı və Quba rayonlarında ictimaiyyətin nümayəndələri və oxucularla görüşəcəklər.

Azərbaycan.-2006.-15 sentyabr.- S. 7.