İsmayılzadə M.

I beynəlxalq rus kitabı sərgisində

Bakıda keçirilən I beynəlxalq rus kitabı sərgisinin iştirakçıları üçün ilk gün maraqlı tədbirlər proqramı ilə yadda qaldı. Festivalın təntənəli açılışından sonra qonaqları ölkə Prezidenti İlham Əliyev qəbul etdi. Qonaqların Heydər Əliyev Fondunda millət vəkili Mehriban xanım Əliyeva ilə görüşü də maraqlı oldu. Azərbaycan Yazıçılar Birliyində görüşdən sonra Azərbaycan Dövlət Filarmoniyasında "Poeziya gecəsi" keçirildi.

Festivalın ikinci günü tədbir iştirakçılarının bir hissəsi respublikamızın səfalı guşələrinə-Şamaxıya, Quba və Xaçmaza yola düşdü. Bakı Slavyan Universitetində görüşdən sonra Atatürk mərkəzində "Rus-Azsrbaycan ədəbiyyatında zaman əlaqəsi" adlı dəyirmi masa keçirildi.

Qonaqlar İçərişəhər, Şirvanşahlar muzeyi və digər tarixi abidələrə də səyahət etdilər.

Çingiz Aytmatov, Qırğızıstanın xalq yazıçısı:

- Azərbaycana, doğma Bakı şəhərinə gəlişimdən çox şərəf duyur və sevinc hissləri keçirirəm. Mənim Bakıda çoxlu dostlarım, eyni zamanda saysız-hesabsız oxucularım var. Əsərlərimin, demək olar ki, hamısı Bakıda çap olunub.

Azərbaycan ədəbiyyatı qədim və tarixi ənənələri olan diyardır. Onları sadalasam, böyük bir siyahı alınar. Sadəcə, bu xalqın ədəbiyyat korifeylərinin sayı başqa ölkələrdən çoxdur.

I beynəlxalq rus kitabı festivalının keçirilməsi olduqca qiymətli və önəmli bir hadisədir. Qeyd etdiyim kimi, bu mənə oxucularım və sənət dostlarımla yenidən görüşmək imkanı yaratdı. Ədəbi əlaqələrin güclənməsi ədəbiyyata olduqca müsbət təsir göstərəcək. Belə tədbirlərin davamlı olması biz yazıçılara da böyük sevinc bəxş edir.

Nikolay Sventitski, "Rusiya-Klub" Beynəlxalq Mədəniyyət Cəmiyyətinin prezidenti:

- Tədbir çox möhtəşəm bir şəraitdə keçir. Festivalın proqramı maraqlıdır. İkinci gündür ki, Bakıdayıq. Ümummilli lider Heydər Əliyevin məzarını, Şəhidlər Xiyabanını ziyarət etməyim yaddaşımdan silinməyəcək. Heydər Əliyev dünyaşöhrətli siyasətçilərdən biridir.

Bakı qonaqpərvər şəhərdir. Mən bunu nəyəsə görə yox, öz gördüklərimə inandıqdan sonra deyirəm. Şəhər həm də günü-gündən gözəlləşir.

Bu festival təkcə kitab bayramı deyil. Mən burada çoxdan görmək istədiyim dostlarımla yenidən görüşdüm. Bax bu əsil bayramdır.

Respublika.- 2006.- 17 sentyabr.- S. 3.