"Aleksandr Düma Qafqazda" layihəsinin iştirakcıları Şəkidə olub

Avropa Şurasının Azərbaycan Mədəniyyət və Turizm Nazirliyi ilə birgə həyata keçirdiyi "Aleksandr Düma Qafqazda" layihəsinin iştirakçıları Şəki şəhərində olublar. Şəhər icra hakimiyyətində keçirilən görüşdə fransalı qonaqları səmimi salamlayan icra hakimiyyətinin başçısı Nazim İbrahimov Şəkinin tarixi, mədəniyyəti, adət-ənənələri, turizm imkanları barədə məlumat verib. Ölkələrimiz arasında dostluğun və mədəni əlaqələrin daha da genişləndirilməsi və möhkəmləndirilməsində belə görüşlərin böyük əhəmiyyətini vurğulayıb. Nümayəndə heyətinin üzvləri Avropa Şurası tərəfindən geniş dəstəklənən bu layihənin xalqlarımız arasında mədəni-tarixi əlaqələrin genişlənməsinə və çoxtərəfli əməkdaşlığın möhkəmləndirilməsinə müsbət təsir göstərəcəyini bildiriblər. Qonaqlara görkəmli fransız yazıçısı Aleksandr Dümanın XIX əsrin ortalarında Rusiyaya və Qafqaza tarixi səfəri, o cümlədən 1859-cu ilin martında Şəkidə olarkən keçirdiyi görüş-lər barədə məlumat verilib. Bildirilib ki, Şəkiyə səfəri yazıçıda dərin təəssürat buraxıb. O, şəhərin qədim yaşayış məhəllələrini gəzib, Şəki xanlarının sarayında, Aşağı Karvansarada olmuş, bazarda alış-veriş də edib. Yazıçı Şəkinin o zamankı tanınmış ziyalılarından olan Şəmsəddin Əbdülqəni Əfəndi Nuxəvinin evində qalıb. Ev sahibinin zəngin kitabxanası qonağın çox xoşuna gəlib və yazıçı bir neçə kitabın ona satılmasını xahiş edib. Ev sahibi isə cavabında "Kitab insanın dostudur, insan öz dostunu satarmı?"deyib. Bununla belə, o, qonağa bir neçə əlyazma verib. Şəki ilə tanışlıqdan sonra Aleksandr Düma Pelerburq və Moskva haqqında təəssüratların artıq onun üçün çox maraqsız olduğunu bildirib. Görüşdən xatirə olaraq qonaqlara şəhərin gerbi əks olunmuş suvenir, habelə Şəki ilə bağlı buklet və kitablar hədiyyə edilib. Avropalı ekspertlər Şəkinin görməli yerlərini gəzmiş və tarixi abidələri ilə tanış olublar. Onlar şəhərin ən böyük sənaye müəsəsi olan "Şəki-İpək" ASC-də istehsal prosesini izləyib, "İpək muzeyi"nə və hazır məhsulların nümayiş etdirildiyi sərgi salonuna baxıblar. Fransalı qonaqlara xatirə hədiyyələri təqdim olunub. Daha sonra qonaqlar Kiş kəndindəki IV əsrə aid qədim alban məbədi, XIX əsrə aid memarlıq abidəsi olan Aşağı Karvansara, Azərbaycan milli memarlığının nadir incilərindən sayılan Şəki xanlarının sarayı ilə də yaxından tanış olublar. Şəhərdəki Nakam adına kitabxanada fransız yazıçı və şairlərin əsərlərindən təşkil edilən kitab sərgisi qonaqlarda böyük maraq doğurub. Daha sonra layihə iştirakçıları tanışlıq məqsədi ilə qonşu Zaqatala rayonuna qısamüddətli səfər ediblər.

Palitra.- 2006.- 5 sentyabr.- S. 12.