Həsənli C.

İlham Əliyev "Təzəpir" məscidinə baş çəkib

Dövlət başçısı ziyarətgahda aparılan təmir işləri ilə tanış olub

Dünən prezident İlham Əliyev "Təzəpir" məscidinə baş çəkib. Dövlət başçısı məsciddə və onun ətrafında aparılan təmir, tikinti, abadlıq işləri ilə tanış olub. Qeyd edək ki, "Təzəpir" məscidi Bakıda yerləşən və prezidentin tapşırığı ilə təmir olunan üç əsas ziyarətgahından biridir. İyun ayından başlayaraq məscid həm təmir olunur, həm də onun ətrafında yeni korpuslar tikilir.

Məsciddə İ.Əliyevə məlumat verilib ki, yüzdən artıq yaşı olan bu ibadətgah müstəqillik dövründə bir neçə dəfə təmir olunsa da, binanın köhnəliyi onun orijinal vəziyyətdə saxlanmasına imkan vermir. Bununla yanaşı, Bakıda baş vermiş zəlzələ nəticəsində günbəzdə çat əmələ gəlib ki, günbəz nəhəng çilçırağm ağırlığına tab gətirmir. Prezidentin nəzərinə çatdırılıb ki, 40-cı illərdə məscid kinoteatra çevrilərkən günbəzin daxili tavanındakı Quran ayəsi pozularaq, üzərinə müxtəlif naxışlar vurulub. Bərpaçılar həmin hissədə yenidən işlənəcək elementin eskizini İ.Əliyevə təqdim edib.

İ.Əliyev öz növbəsində məscidin yüksək səviyyədə təmiri üçün tapşırıqlar verib. Binanın fasadında aparılan təmir işləri ilə tamş olan dövlət başçısı bu memarlıq abidəsinin daha baxımlı olması üçün tövsiyələrini verib.

O, məscid ətrafinda tikilən yeni korpuslara da baxış keçirib. Qeyd edək ki, Qafqaz Müsəlmanları İdarəsinin yerləşəcəyi korpusun birinci mərtəbəsi ziyarətçilərə müxtəlif xidmətlər göstərən otaqlardan ibarət olacaq. Kompleksin digər otaqlarında qonaq otaqları, onun qarşısındakı geniş zalda isə müxtəlif mərasimlərin keçirilməsi üçün bütün şərait yaradılacaq. Daha bir korpus isə İslam Universiteti üçün nəzərdə tutulub. Prezident ziyarətgahın layihə-smeta sənədləri, həmçinin yeni binaların fasad hissələrinin müxtəlif istiqamətlərdən görüntüsünün eskizi ilə də tanış olub. Dövlət başçısına məlumat verilib ki, burada ən müasir tikinti texnologiyasından istifadə olunacaq və dünya standartlarına uyğun ventilyasiya sistemi qurulacaq. İ.Əliyev məscid kompleksinin giriş hissəsindəki küçələrin genişləndirilməsi, lazım gələrsə, köhnə tikililərin sökülməsi, ən əsası- milli memarlıq nümunələrindən istifadə edilməsi ilə bağlı konkret tapşırıqlar verib.

Həftə içi.- 2006.- 22 sentyabr.- S. 1-2.