Qədim yaşayış məskənləri erməniləşdirilir

Əbülfəs Qarayev: "Prosesin qarşısını almaq üçün Azərbaycanın təzyiq gücü yoxdur"

"İşğal edilmiş torpaqlarda və Qərbi Azərbaycanda arxeoloyi qazıntıların aparılması, tarixi-mədəni abidələrin erməniləşdirilməsi prosesinin qarşısını almaq üçün Azərbaycanın təzyiq gücü yoxdur". Bunu deyən mədəniyyət və turizm naziri Əbülfəs Qarayevin sözlərinə görə, ermənilərin tarix və mədəniyyətimizə qəsdi bu gün də davam etdirilir: "Belə faktlarla tez-tez rastlaşırıq, məscidlərimiz dəyişdirilərək kilsəyə çevrilir, qədim yaşayış məskənləri bərpa adı ilə erməniləşdirilir, erməni memarlıq abidəsi nümunələri adlandırılır".

Buna qarşı mübarizə üsullarının beynəlxalq təşkilatlara etiraz, internet səhifələrində, mətbuatda faktların ictimaiyyətə çatdırılması ilə yekunlaşdığını deyən nazir hələlik bundan başqa təzyiq vasitəsinin olmadığını vurğulayıb.

Qeyd edək ki, Mədəniyyət və Turizm Nazirliyi mayda Azərbaycana səfər edəcək Avropa Komissiyasının nümayəndələrinə və YUNESKO-ya işğal olunmuş torpaqlarımızda memarlıq və mədəni irsin dağıdılması ilə bağlı faktlar təqdim etməyə hazırlaşır. Ə.Qarayevin fikrincə, artıq faktlar toplanıb və ingilis dilinə tərcümə edilib. Nazirin sözlərinə görə, beynəlxalq qurumlara təqdim ediləcək faktlar arasında Şuşada "yenidənqurma" adı ilə aparılan dağıntı işləri, Ağdamda aparılan arxeoloyi qazıntılar və digər məlumatlar var: "Burada söhbət yalnız bu gündən getmir, bütünlüklə Azərbaycan mədəni irsinə təcavüzdən, mövcud vəziyyətdən gedir. Proses bu gün də davam edir və ona nəzarət etmək çox çətindir".

Kaspi.-2007.-4 aprel.-S.17.