Aleksandr Düma Qafqazda beynəlxalq mədəni-tarixi marşrutunun təqdimatı olmuşdur

AzərTAc xəbər verir ki, aprelin 18-də Heydər Əliyev adına İdman-Konsert Kompleksində "Turizm və səyahətlər" VI Beynəlxalq sərgisi və 1-ci Azərbaycan beynəlxalq "Mehmanxana biznesi" sərgisi açılmışdır. "İteka Kaspian" şirkətinin, Mədəniyyət və Turizm Nazirliyinin, Azərbaycan Ticarət və Sənaye Palatasının təşkil etdikləri sərgilərdə 18 ölkənin 40-dan çox şirkəti təmsil olunmuşdur.
Açılış mərasimində çıxış edən mədəniyyət və turizm naziri Əbülfəs Qarayev bildirmişdir ki, turizm sektorunun inkişafı respublika rəhbərliyi tərəfindən iqtisadiyyatın öncül istiqamətlərindən biri kimi müəyyənləşdirilmişdir. Sahənin hərtərəfli inkişafı, ölkəmizin turizm imicinin yüksəldilməsi məqsədi ilə yaraşıqlı istirahət obyektləri ucaldılır, bölgələrdə infrastruktur təkmilləşdirilir. Hazırda 25 hotel tikilməkdədir. Ölkəmizin bütün mehmanxana obyektləri lisenziyalaşdırılacaq, onlara "ulduz" dərəcəsi göstərilməklə, sertifikatlar veriləcəkdir.
Azərbaycana gələn turistlərin sayı ilbəil artır. Ə.Qarayev bildirmişdir ki, yaxın 10 ildə 3 milyondan çox qonaq gözlənilir.
Nazir Bakı sərgisinin siyasi əks-sədasından danışarkən qeyd etmişdir ki, ilk dəfə "Qarabağ Azərbaycan mədəniyyətinin beşiyidir" adlı ayrıca ekspozisiya təqdim olunacaqdır.
"Mehmanxana biznesi" sərgisinin iştirakçıları arasında mehmanxanalar, konqres-hollar, istirahət evləri, restoranlar, barlar, klublar və əyləncə mərkəzləri üçün texnologiyalar, materiallar, avadanlıq və xidmət istehsalçıları və tədarükçüləri var.
Sərgilərin ilk iş günündə "Aleksandr Düma Qafqazda" beynəlxalq mədəniyyət-turizm marşrutunun təqdimatı olmuşdur. Mədəniyyət və Turizm Nazirliyinin təşəbbüsü ilə hazırlanan layihəni Avropa Şurası dəstəkləmişdir. Avropa İttifaqının 2007-2009-cu illər üçün nəzərdə tutulan "Kiyev təşəbbüsü" regional proqramı çərçivəsində həyata keçiriləcək layihə Azərbaycan, Gürcüstan və Rusiyada turizmin inkişafına yönəldilmişdir. Layihə 1858-ci ildə Qafqazda olmuş və səfəri barədə kitab yazmış böyük fransız yazıçısı Aleksandr Dümanın səyahətinin marşrutunu dirçəldəcəkdir.
Marşrut Dağıstanın Qızlar şəhərindən başlanıb, Bakı-Quba, Bakı-Şəki istiqamətlərini əhatə edəcək və Gürcüstanın Poti şəhərində başa çatacaqdır. Layihənin strategiyası ixtisaslı bələdçilərin hazırlanmasını, yazıçının səyahətləri haqqında sənədli filmlərin və animasiya filmlərinin çəkilməsini, informasiya və suvenir məhsullarının hazırlanmasını, marşrut boyu "Aleksandr Düma Qafqazda" mehmanxana və restoranlarının açılmasını nəzərdə tutur.

Azərbaycan.- 2007.- 19 aprel.- S. 8.