Azərbaycan Turizm Sənayesinin İnkişafı İttifaqında görüş

Ölkəmizdə işgüzar səfərdə olan Türkiyə Turizm Agentlikləri Birliyi idarə heyətinin sədri Başaran Ulusoy aprelin 8-də Azərbaycan Turizm Sənayesinin İnkişafı İttifaqında turizm şirkətlərinin nümayəndələri ilə görüşmüşdür.
Turizm sahəsində Azərbaycan-Türkiyə əməkdaşlığı məsələlərinin müzakirə olunduğu görüşdə Başaran Ulusoy demişdir ki, ölkəmizə səfəri turizm sahəsində böyük potensialı olan Azərbaycan şirkətləri ilə əməkdaşlıq sazişlərinin bağlanması və TÜRSAB-ın Bakıda ofisinin açılması ilə əlaqədardır.
Qonaq turizm təşkilatlarını birləşməyə, sağlam rəqabət şəraitində Azərbaycanı tanıtmağa çağırmışdır. B.Ulusoy demişdir ki, “Azərbaycan gözəldir” deməklə iş bitmir, bütün dünyaya Azərbaycanın təkcə neft ölkəsi olmadığını sübut etmək lazımdır. Bu isə sizdən, işinizi necə qurmağınızdan, ölkənizi cazibə mərkəzinə çevirməyi bacarmağınızdan çox asılıdır. O vurğulamışdır ki, vaxtilə “səyahət yolu” kimi tanınan Böyük İpək yolunun “iqtisadiyyat yolu”na çevrilməsində Azərbaycan böyük önəm daşıyır. Türkiyədən Çinə mümkün turizm marşrutunda Azərbaycan mühüm ölkədir və səfər çərçivəsində mədəniyyət və turizm naziri Əbülfəs Qarayevlə bu marşrutun açılmasına dair birgə planlar müzakirə olunmuşdur.
B.Ulusoy turizm sahəsində Azərbaycan mütəxəssislərinin Türkiyədə təlim keçməsinə kömək etməyə hazır olduğunu bildirmişdir.
Şirkətlərin təmsilçiləri əməkdaşlıq barədə təkliflər irəli sürmüşlər.
Başaran Ulusoy görüş iştirakçılarını maraqlandıran suallara cavab vermişdir.

Xalq qəzeti.-2007.-10 aprel.-S.6.